O‘zbekiston Respublikasi Prezidenti IHT sammitida nutq so‘zladi
"Bugungi kunda barchamiz global va mintaqaviy vaziyatning tobora murakkablashib borayotganiga guvoh bo‘lib turibmiz. Bunday o‘zgaruvchan sharoitda quyidagi ustuvor yo‘nalishlar bo‘yicha umumiy saʼy-harakatlarimizni birlashtirish zarur, deb hisoblaymiz".
Davlatimiz rahbari o‘z nutqida davom etayotgan pandemiya taʼsirida jahon iqtisodiyoti rivojida qanday tendensiyalar kuzatiladi, xalqaro hamjamiyat yana qanday yangi xavf-xatarlarga duch keladi, degan savollarga hamon aniq javob yo‘qligini ham aytib o‘tgan.
Shuningdek, bunday o‘zgaruvchan sharoitda birgalikda harakat qilish kerakligini taʼkidlab, bir qator yo‘nalishlarni o‘rtaga tashlagan.
Jumladan, O‘zbekiston Respublikasi Prezidenti Birinchi yo‘nalishda 500 milliondan ortiq aholi yashaydigan, ulkan bozorga ega bo‘lgan mamlakatlarimizning savdo va investitsiya sohalaridagi katta imkoniyatlaridan to‘liq foydalanish zarurligi taʼkidlagan. Bunda savdo ko‘lamini oshirish, mamlakatlar o‘rtasida savdo-iqtisodiy va investitsiya aloqalarini yana-da kengaytirish maqsadlari nazarda tutilgan.
Ikkinchi yo‘nalish mintaqadagi mavjud va yangi transport yo‘laklaridan unumli foydalanish haqida bo‘lib, bunda mintaqalararo tranzit harakatini yana-da jadallashtirish maqsad qilingan.
“Bu rejalarni ro‘yobga chiqarish uchun mamlakatlarimizning transport-kommunikatsiya aloqalarini rivojlantirish va tranzit salohiyatini kengaytirishga qaratilgan mintaqaviy strategiyani ishlab chiqish maqsadga muvofiqdir", - degan O‘zbekiston Respublikasi Prezidenti.
Uchinchi yo‘nalish “yashil taraqqiyot”ga erishish uchun amaliy saʼy-harakatlarimizni safarbar etishimiz haqida bo‘lib, buning uchun xalqaro ekolog olimlar va ekspertlar ishtirokida yuqori darajadagi (ekologiya vazirlari) doimiy Muloqot kengashini tuzishni taklif etilgan.
To‘rtinchi yo‘nalishda esa sayyohlik almashuvlarini qayta tiklash masalasi ko‘tarilgan.
“Buxoro shahrida 2022 yili bo‘lib o‘tadigan turizm vazirlarining navbatdagi uchrashuvida pandemiyadan keyingi davrda Xavfsiz sayyohlikni rivojlantirish umummintaqaviy Dasturini qabul qilish tashabbusini bildirmoqchiman.
Shu asosda “ziyorat turizmi” va boshqa qo‘shma sayyohlik mahsulotlarini ishlab chiqish, aviaqatnovlar geografiyasini kengaytirish, turizm infratuzilmasini rivojlantirishga jiddiy eʼtibor qaratilgan bo‘lar edi”, - degan davlatimiz rahbari Shavkat Mirziyoyev.
