“O‘zgidromet” hafta davomida qanday ob-havo kuzatilishini maʼlum qildi
Hafta davomida havo harorati 22 daraja issiqqacha ko‘tariladi.
Bugun va ertaga O‘zbekiston hududi bo‘yicha quyoshli va ochiq kun bo‘lishi kutilmoqda, tushdan so‘ng havo 12-17 daraja iliqqacha ko‘tariladi, kechalari havo harorati 3-6 daraja iliqni tashkil etadi. Bu haqda “O‘zgidromet” xabar berdi.
Xabarga ko‘ra, 1-2 dekabrda janubiy hududlardan iliq havo massalari kirib kelishi kutilmoqda, harorat kechalari 6-9 daraja iliqqacha, kunduz kunlari 17-22 daraja iliqqacha ko‘tariladi, bu dekabr oyi boshi uchun bo‘lgan meʼyordan 8-11 darajaga yuqoridir.
Taʼkidlanishicha, faqat 2-dekabrda shimoliy hududlarga biroz nam va salqin havo massalari kirib kelishi kutilmoqda, buning hisobiga Qoraqalpog‘istonda va Xorazm viloyatida baʼzi joylarda yomg‘ir yog‘ishi mumkin.
3-dekabrda havo massalarining kirib kelishi respublikaning qolgan hududlariga tarqaladi. Ayrim hududlarda (shimol va Farg‘ona viloyatidan tashqari) biroz yomg‘ir yog‘ishi mumkin. 3-dekabrda harorat foni nisbatan pasayadi, lekin hali ham meʼyordan yuqori bo‘ladi. Kunduz kunlari havo harorati 13-18 daraja iliqni tashkil etadi.
