“Tolibon” Afg‘onistonning O‘zbekiston bilan chegaradosh viloyatida harbiy mashg‘ulot o‘tkazdi
Unga harbiy-havo kuchlari jalb qilingan.
“Tolibon” hokimiyatni egallagandan so‘ng, ilk bor harbiy-havo kuchlari mashg‘ulotini o‘tkazdi. Bu haqda TOLOnews telekanali xabar berdi.
Mashg‘ulotlar mamlakat shimolidagi Balx viloyatida bo‘lib o‘tgan. Toliblar qo‘mondonlaridan biri Omonuddin Mansurning so‘zlariga ko‘ra, unga Mi-17 va AQSHning MD vertolyotlari jalb etilgan.
Shu bilan birga avvalgi hukumat davrida xizmat qilgan harbiy-havo kuchlari askarlari, ayniqsa, texnik xodimlar hozirda “Tolibon”ga xizmat qilayotgani qayd etilgan.
"Harbiy-havo kuchlarining butun shaxsiy tarkibi har qanday sharoit va ob-havoda uchishga shay holatda. Ular zarur vositalar yetishmasa-da, vertolyotlarni texnik soz saqlashyapti", — degan qo‘mondonlardan biri Muhammad Ahmadzay. Shuningdek, Omonuddin Mansur mamlakatdan chiqib ketgan uchuvchilarni Afg‘onistonga qaytishga chaqirdi.
Shu bilan birga, u tez orada toliblar barcha soz va nosoz vertolyotlar sonini bilish uchun aeroportlardan zarur maʼlumotlar to‘planishini maʼlum qilgan.
Avvalroq “Tolibon” aeroportlar masalasida Yevropa Ittifoqidan yordam so‘ragani xabar qilingandi
Jahongir Qo'ziyev
