400 millionlik kreditni “uxlatgan” firibgar qo‘lga olindi
Hozirda tergov harakatlari olib borilmoqda.
Bu haqda Bosh prokuratura xabar berdi.
Departamentning Uchtepa tuman bo‘limi tomonidan tadbirkorlik subyektlarining huquqlarini himoya qilish yuzasidan tergovga qadar tekshiruv o‘tkazildi.
Unga ko‘ra, mazkur tumanda istiqomat qiluvchi “D.K.” MCHJ rahbari O‘.S. “S.Y.” shoʻba korxonasi rahbarining ishonchiga kirib, korxona mulkini firibgarlik yo‘li bilan kredit taʼminoti uchun garovga qo‘yadi. Oqibatda, bank muassasasidan 400 mln so‘m kredit olishga erishadi. Ushbu kredit mablag‘ini boshqa xususiy korxonaga o‘tkazish orqali naqdlashtiradi va pullarning 50 mln so‘mini “S.Y.” korxonasi rahbariga beradi. Qolgan 350 mln so‘mini o‘zlashtirish yo‘li bilan o‘z shaxsiy manfaatlariga ishlatib yuborgani maʼlum bo‘ldi.
Ushbu holatga Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish) va 168-moddasi (firibgarlik) bilan jinoyat ishi qo‘zg‘atilgan.
Eslatib o‘tamiz, avvalroq Buxoroda nogironlik nafaqasini rasmiylashtirib berishni vaʼda qilgan firibgar ushlangani hamda fuqarolarni Koreya Respublikasiga ishga yuborishni vaʼda qilgan firibgarlar qo‘lga tushgani haqida xabar berilgandi. Shuningdek, zaxiradagi yer maydonini sotmoqchi bo‘lgan shaxs ushlangandi.
Cho‘lponoy Ahmedova
