IIV xodimlari tomonidan maxsus vositalarni qo‘llash tartibi mavjud

 

“Ichki ishlar organlari to‘g‘risida”gi Qonunga muvofiq, ichki ishlar organi xodimi faqat qonunda nazarda tutilgan hollarda va tartibda o‘qotar qurol va maxsus vositalarni olib yurish, saqlash, ularni qo‘llash va jismoniy kuch ishlatish huquqiga ega.

 

Hujjatning 23-moddasida ichki ishlar organi xodimi tomonidan maxsus vositalardan qanday hollarda foydalanish mumkinligi yozib qo‘yilgan. Jumladan:

👉 fuqaroga yoki ichki ishlar organi xodimiga qilingan hujumni qaytarish;

👉 jinoyatga yoki maʼmuriy huquqbuzarlikka chek qo‘yish;

👉 ichki ishlar organi xodimiga qarshilik ko‘rsatilishiga chek qo‘yish;

👉 jinoyatni sodir etish chog‘ida yoki uni sodir etganidan keyin darhol ko‘rib qolingan, yashirinishga urinayotgan shaxsni ushlash;

👉 qurolli qarshilik ko‘rsatishi mumkin bo‘lgan shaxsni ushlash;

👉 ushlab turilgan shaxslarni va qamoqqa olingan, maʼmuriy qamoqqa olingan shaxslarni olib borish, qo‘riqlab borish va qo‘riqlashda, shuningdek qochishga urinishini, atrofdagilarga yoki o‘ziga zarar yetkazishini bartaraf etish;

👉 zo‘ravonlik bilan ushlab turilgan shaxslarni, egallab olingan binolarni, xonalarni, inshootlarni, transport vositalarini va yer uchastkalarini ozod qilish;

👉 fuqarolarning hayoti va sog‘lig‘iga, jamoat xavfsizligiga tahdid soluvchi ommaviy tartibsizliklarga hamda boshqa g‘ayriqonuniy xatti-harakatlarga chek qo‘yish;

👉 haydovchisi ichki ishlar organi xodimining to‘xtash to‘g‘risidagi talabini bajarmagan transport vositasini to‘xtatish;

👉 jinoyatlar yoki maʼmuriy huquqbuzarliklar sodir etayotgan yoxud sodir etgan shaxslarni aniqlash;

👉 muhofaza qilinadigan obyektlarni himoya qilishda, g‘ayriqonuniy xatti-harakatlarni sodir etayotgan fuqarolar guruhlarining harakatlanishini to‘sib qo‘yish.

 

Mazkur moddaning ikkinchi qismiga asosan 1–5, 7, 8 va 11-asoslarda ko‘rsatib o‘tilgan hollar vujudga kelganda ichki ishlar organlari xodimlari rezina tayoqlardan foydalanishi mumkin.

 

8 va 9-asoslarda ko‘rsatib o‘tilgan hollarda esa transport vositalarini majburiy to‘xtatish vositalarini qo‘llash mmumkin.

 

Agar jismoniy kuch ishlatish, maxsus vositalarni yoki o‘qotar qurolni qo‘llash qonunda belgilangan asoslar bo‘yicha va tartibda amalga oshirilgan bo‘lsa, ichki ishlar organi xodimi jismoniy kuch ishlatish, maxsus vositalarni yoki o‘qotar qurolni qo‘llash chog‘ida jismoniy va yuridik shaxslarga yetkazilgan zarar uchun javobgar bo‘lmaydi.

“Ichki ishlar organlari to‘g‘risida”gi Qonun.  21-modda.

 

Yuridik va jismoniy shaxslar faqatgina qonunchilik hujjatlariga rioya etgan holda ish ko‘rishi lozim.

Avvalroq Toshkentda “Lacetti” haydovchisi YPX xodimiga bo‘ysunmasdan qochib ketgani hamda Ichki ishlar xodimlariga elektroshokdan foydalanishga ruxsat berilgani haqida xabar berilgandi.

 

Olamgir Abdiyev