Metrodagi “probka”ni bartaraf etish uchun qo‘shimcha poyezdlar qo‘yiladi
Harakatlarda kuzatilayotgan nosozliklarning asosiy sabablari ham o‘rganilishi ko‘zda tutilgan.
Bu haqda "Toshkent metropoliteni” DUK tarkibiy tuzilmalarining rahbarlari bilan o‘tkazilgan yig‘ilishda aytib o‘tildi.
Xususan, yig‘ilish davomida quyidagi masalalar topshiriq sifatida masʼullar zimmasiga yuklatilgan.
Unga ko‘ra:
— Tirbandliklarni oldini olish, yo‘lovchilarga qulaylik yaratish, xizmat ko‘rsatish sifatini oshirish, poyezdlar harakati oraliq intervallarini qisqartirish maqsadida, poyezdlar harakati jadvali qayta ko‘rib chiqish;
— Metropoliten barcha yo‘nalishlarda “tig‘iz paytlarda” oraliq intervallarini maksimal darajada qisqartirish va barcha imkoniyatlardan foydalangan xolda qo‘shimcha harakat tarkiblari sonini ko‘paytirish;
— Metropolitenning asosiy ish faoliyatiga taʼsir qilmagan xolda “Chilonzor” elektrodeposi tasarrufidagi harakat tarkiblari texnik ko‘rikdan o‘tkazilib, hafta so‘nggiga qadar aniqlangan nosozliklar va amalga oshirilgan ishlar yuzasidan tasdiqlovchi foto suratlar ilova qilgan xolda maʼlumot taqdim etish;
Bundan tashqari, joriy yilning so‘nggi 6 oylik davrida qayd etilgan metropoliten harakat tarkiblarining texnik nosozlik tufayli liniyadan chetlatilganligi xolatlari soni, nosozlik sabablari, nosozlik qayd etilgan uskuna yoki tizimlar to‘g‘risida tahliliy maʼlumot tayyorlab kiritish ham ko‘zda tutilgan.
Jumladan, yerusti xalqa yo‘li qurilish ishlarining 2 - bosqichi № 8-9-10-11- metro bekatilarining qurilish obyektiga montaj ishlar bo‘yicha biriktirilgan ishchi guruhning har bir maʼsul xodimi tomonidan qurilish holatini puxta o‘rganib, hafta davomida aniqlangan va avval ko‘rsatilgan lekin bartaraf etilmagan kamchiliklar bo‘yicha maʼlumotlar, tasdiqlovchi fotosuratlar ilova qilingan xolda sharxlari bilan tayyorlab taqdim etish vazifasi ham yuklatilgan.
Eslatib o‘tamiz, avvalroq Rossiyadan O‘zbekistonga 20 ta zamonaviy metro vagonlari yuborilishi hamda 1 yanvardan "Toshkent metropoliteni" xodimlariga qo‘shimcha rag‘batlantirishlar joriy etilishi haqida xabar berilgandi.
Cho‘lponoy Ahmedova
