Rossiyada o‘quvchi sinfdoshining ko‘ziga kalit tiqib, jarohatladi
Bola o‘qituvchilariga ham bir necha marta tashlangan.
Rossiyaning Nefteyugansk shahrida uchinchi sinf o‘quvchisi Igor o‘z sinfdoshining ko‘zini jarohatladi. Bu haqda 360 tv.ru sayti maʼlum qildi. Ota-onalarning aytishicha, bolada avval ham o‘quvchilarning ko‘ziga qalam, ruchka tiqib olish holatlari kuzatilgan.
Ko‘zi jarohatlangan bolaning onasi Yuliyaning aytishicha, Igor uch yildan buyon maktabdagi tengqurlariga ozor berib kelgan. Hatto, u o'rtoqlari qorniga pichoq ham sanchigan. Ona esa o‘g‘lini birinchi sinfdan boshlab kaltaklab kelgan.
Ayol Igorning maktabga bir necha marta oshxona pichog‘i bilan kelganiga ham guvoh bo‘lgan. Shuningdek, sinfdosh qizlarning yuziga o‘z-o‘zidan besabab tarsaki tushirishlari, tarix o‘qituvchisini velosiped zanjiri bilan kaltaklagani, sochlarini yulgani va hattoki baʼzi o‘qituvchilar u tufayli ariza yozib ishdan ketgani haqida ham maʼlumotlar bergan.
Surishtiruvlar davomida Igor bolalar bog‘chasidan boshlab ruhiy shifoxonada ro‘yxatda turishi maʼlum bo‘ldi. Ammo onasi o‘g‘lining bu holatini yaxshi bilsa-da, maktab maʼmuriyatidan yashirgan. O‘g‘lini o‘z vaqtida davolatmagan.
Keyinchalik maktab maʼmuriyati muammodan xabar topgach, hal etish choralarini ko‘rmagan. Voyaga yetmaganlar bilan ishlash bo‘yicha inspektor esa Igorning 14 yoshga to‘lmagani sabab chora ko‘rilmaganini maʼlum qilgan.
Hozirda maktab o‘quvchisining ko‘zidan jarohatlangani yuzasidan shahar tergov bo‘linmasi surishtiruv ishlarini olib bormoqda.
Munojat Valiyeva
