“Amazon”da e-tijorat bilan shug‘ullanayotgan farg‘ona ayollari

 

Viloyat hokimi Xayrullo Bozorov Farg‘ona tumanidagi o‘rganishlar doirasida “Sadosh” brendi ostida qo‘g‘irchoqlar tayyorlashni yo‘lga qo‘ygan tadbirkor Sadoqatxon Mirzayeva faoliyati bilan tanishdi.

 

Eslatib o‘tamiz, bu ayol avvaliga maktabda oddiygina mehnat o‘qituvchisi sifatida faoliyat yuritgan. Uning so‘zlariga ko‘ra, bu hunarni ham o‘quvchilariga yangicha bilim o‘rgatish maqsadida internet orqali zrgangan. Qiziqish kichik tadbirkorlikka yo‘l ochib bergan.

 

Kashtachilik, quroqchilik, qo‘g‘irchoq va o‘yinchoqlar to‘qish sir-sinoatlarini yaxshi egallagan Sadoqatxon Mirzayeva mahalladagi ishsiz ayollarni ham jalb qilgan holda qo‘l mehnati bilan qo‘g‘irchoq tayyorlaydi. Ishlar boshlanganiga ko‘p bo‘lgani yo‘q. Shunga qaramay, hozirdanoq “Amazon” xalqaro onlayn savdo platformasida kuniga 3-4 ming dona qo‘g‘irchoq sotilmoqda.

 

Tadbirkor tomonidan qo‘g‘irchoqlarni qo‘shni respublikalar, BAA, AQSH davlatlariga eksport qilish ham rejalashtirilgan. Buning uchun 2022 yilning birinchi choragida qiymati 1 mlrd. so‘m bo‘lgan loyiha amalga oshirilib, qishloqda kooperatsiya tashkil etiladi va 250 ta yangi ish o‘rinlari yaratiladi. Kooperatsiyaning yillik ishlab chiqarish hajmi 3 mlrd. so‘mni tashkil etishi ko‘zda tutilgan.

 

Tadbirkor kuni kecha Shohimardonsoy MFYdagi bo‘sh turgan binoda ish boshladi va kooperatsiya faoliyatini yo‘lga qo‘yish uchun bu dastlabki qadam bo‘ldi. Bu yerda milliy hamda zamonaviy uslubda kashtachilik, quroqchilik, qo‘g‘irchoq va o‘yinchoqlar to‘qish yo‘lga qo‘yilmoqda. Ayni kunda faoliyat orqali 30 nafar xotin-qizlar bandligi taʼminlandi.

 

Viloyat hokimi bilan muloqotda tadbirkor 1 mlrd. so‘m subsidiya olishda ko‘mak so‘radi. Masalani ijobiy hal qilish uchun mutasaddilarga, allaqachon, topshiriq berildgan.

 

 

Avvalroq, Telegram‘ sahifamiz orqali Sadoqatxon Mirzayevaning faoliyati haqida videolavha taqdim etgandik. 

 

Maftuna Rejabboyeva