Jurnalistlar "Gʻijduvon" erkin iqtisodiy zonasi bilan tanishdi
Shu kunlarda bir qator OAV xodimlari ishtirokida respublikamiz viloyatlarida press-turlar tashkil etilmoqda.
Bugun Prezident Administrasiyasi xuzuridagi Axborot va ommaviy kommunikasiyalar agentligi tomonidan OAV xodimlari uchun Buxoro viloyatining "Gʻijduvon" erkin iqtisodiy zonasida precs-tur tashkil etildi.
Ushbu press-tur doirasida jurnalistlar "Buxoro Fayz Tekstil" MJCh korxonasi bilan yaqindan tanishdi. Korxona rahbari Mustaqin To‘xtayevning ta’kidlashicha mazkur ishlab chiqarish zonasida 200 ga yaqin ish o‘rinlari yaratilgan bo‘lib, kelgusi yilda yana 100 nafar aholini ish bilan ta’minlash rejalashtirilgan.
- Bu ishlab chiqarish korxonasini 2017 yilda tashkil etgan edik. Mana shu vaqt mobaynida bir qator ishlarni amalga oshirdik. Xususan, korxonamizda eksport hajmini yildan-yilga oshirish rejasi ishlab chiqilgan. O‘tgan pandemiya davrida eksport miqdori 5 million dollarni tashkil etgan bo‘lsa, kelgusida bu ko‘rsatkichlarni 7-8 million dollarga yetkazish niyatimiz bor. Bugungi kunda korxonamizning asosiy eksportini ip-kalava mahsulotlari tashkil etmoqda. Keyingi yilda Belgiya davlati bilan hamkorlikda bo‘z mahsulotini ishlab chiqarishni yo‘lga qo‘ymoqchimiz. Shu tariqa ip-kalava bilan bir qatorda, bo‘z mahsulotini ham eksport qilishni maqsad qilganmiz.
Eslatib o‘tamiz, mazkur "G'ijduvon" erkin iqtisodiy zonasi O‘zbekiston Respublikasi Prezidentining 2017 yil 12 yanvardagi PF-4931-sonli "Urgut", "Gʻijduvon", "Qo‘qon" va "Hazorasp" erkin iqtisodiy zonalarini tashkil etish to‘g‘risida"gi Farmoniga asosan tashkil etilgan.
