"Iyman textile"da kelajak uchun yangi rejalar yaratilmoqda
Qashqadaryo viloyatida OAV xodimlari uchun press-tur tashkil etildi.
Bugun Axborot va ommaviy kommunikasiyalar agentligi tomonidan jurnalist va blogerlar uchun Qashqadaryo viloyatining ayrim ishlab chiqarish korxonalarida press-turlar tashkil etildi. Xususan, OAV xodimlari Qarshi tumanida joylashgan "Iyman textile" tikuvchilik majmuasi bilan yaqindan tanishdi.
- Mazkur korxonamizning ochilganiga atigi bir oy bo‘ldi, - deydi "Iyman textile" tikuvchilik majmuasi direktori Arsen Bitiktash. Bugungi kunda ishlab chiqarish zonamizda 55 nafarga yaqin ayollarimizni ish bilan ta’minlaganmiz. Korxonamizda asosan talabga qarab mahsulot tayyorlashga harakat qilmoqdamiz. Endi faoliyat boshlaganimizga qaramay 6 oydan so‘ng mahsulotlarimizni Rossiya va Belorussiya davlatlariga eksport qilish rejalarimiz bor. Tikuvchilik majmuamizda ishchilarimizning oyligi 900 ming so‘mdan boshlanadi. Biroq kelgusida bu borada ham ko‘rsatkichlarimizni oshirish niyatimiz bor. Ishxonamizdagi mashinalar Turkiya davlatidan keltirilgan. Ularning umumiy soni 30-35 tani tashkil etadi. Kelgusi yillarda faoliyatimizga qarab eksport hajmiga bor e’tiborimizni qaratmoqchimiz.
- Men ushbu tikuvchilik majmuasi ochilganidan beri ishchi xodim bo‘lib ishlab kelmoqdaman. Ish joyimizda shart-sharoitlar a’lo darajada. Ikki mahal ovqat berishadi. Har kuni ishxonamizning maxsus avtobusi bizni uyimizdan olib keladi va kechga yana olib borib qo‘yadi. Hozirda 1 million 500 ming so‘m oylik olaman. Maoshim oilamning ayrim kamchiliklarini yopishga yetib turibdi. Keyinroq ish hajmi oshirilganidan so‘ng oyliklarimiz ham oshishi mumkin. Bajaradigan yumushimiz ham uncha qiyin emas. Biz mahsulotning oxirgi qismiga ishlov beramiz. Keyin tayyor holatga keltirish uchun dazmollashga yuboriladi, - deydi shu yerda ishlayotgan xodimlardan biri Azimova Sohiba.
Jamshidbek Amirov
