“Kosmonavtlar” metro bekatida poyezd vagoni yondimi?
Bugun ijtimoiy tarmoqlarda “Kosmonavtlar” metro bekatida kuchli yong‘in chiqqani haqida video tarqaldi.
Aslida voqea qanday bo‘lgan?
Toshkent shahar FVB matbuot xizmati rahbari Anvar Rustamovning aytishicha , bugun, 23 dekabr kuni soat 12:15 da Shayxontoxur tumani “Kosmonavtlar” metro bekatida harakatlanib ketayotgan 4 ta vagondan iborat tarkibning 3-vagonida qisqa tutashuv bo‘lgan. Bunga sabab vagon saqlagich (predoxranitel) kuygani yoki tormoz kolodkasi siqib qolgani taxmin qilinmoqda. Yong‘in kelib chiqmagan. Nosoz vagon — taʼmirlash uchun DEPOga yuborilgan.
Toshkent metropoliteni DUK xabarida esa 12:10 lar atrofida “Kosmonavtlar” metro bekatida 34-sonli harakat tarkibida mashinist tomonidan nosozlik aniqlandi, deyiladi va yo‘lovchilardan uzr so‘ragan.
Shuningdek, fuqarolar xavfsiz joyga evakuatsiya qilingan. Hodisa oqibatida jabrlangan va halok bo‘lganlar yo‘q.
Voqea joyiga shahar hamda tuman FVB rahbar xodimlari va 2 ta yong‘in-qutqaruv ekipajlari jalb etilgan. Hozirda vaziyat oqibatlari bartaraf etilgan.
Avvalroq Toshkent metrosining “Sergeli” yo‘nalishida poyezdlar harakati vaqtincha to‘xtatilgani hamda Rossiyadan O‘zbekistonga 20 ta zamonaviy metro vagonlari yuborilgani haqida xabar berilgandi.
Munojat Valiyeva
