Buxoro va Surxondaryo viloyatlarida Mehribonlik uylari yopildi
Shu bilan faoliyati to‘xtatilgan tashkilotlar soni 8 taga yetdi.
Dastlab Namangan, Navoiy, Farg‘ona va Xorazm viloyatlarida, shuningdek, Qoraqalpog‘iston Respublikasida Mehribonlik uylari yopilib, jami 1007 nafar bola o‘z oilasiga ega bo‘ldi. Ular “Oilaviy” bolalar uyiga qabul qilinmoqda yoki o‘z qarindoshlari tomonidan vasiylikka olinmoqda.
Surxondaryo va Buxoro viloyatlaridan ham Mehribonlik uylari yopilib, faoliyati to‘xtatilgan tashkilotlar soni 8 taga yetdi.
Maʼlumot uchun, O‘zbekiston Respublikasi Prezidentining “Yetim bolalar va ota-ona qaramog‘idan mahrum bo‘lgan bolalarni davlat tomonidan qo‘llab-quvvatlashning yangi tizimini joriy etish chora-tadbirlari to‘g‘risida”gi qaroriga ko‘ra, “Oilaviy” bolalar uyini tashkil qilish istagini bildirgan 35 yoshdan 55 yoshgacha bo‘lgan yurtdoshlarimiz o‘z hududidagi Xalq taʼlimi bo‘limi va vasiylik kengashlariga murojaat qilishi kerak. Ular fuqaroning sharoitlarini belgilangan talab asosida o‘rganib chiqadi. Agar “Oilaviy” bolalar uyi tashkil qilmoqchi bo‘lgan fuqaro ko‘rsatilgan barcha talablarga mos deb topiladigan bo‘lsa, unga eng kami besh nafardan o‘n ikki nafargacha bola beriladi. Bu bolalar uchun qonunda belgilangan barcha imtiyozlar joriy etiladi.
