1-fevraldan boshlab ekologiya va ko‘kalamzorlashtirish masalalari bo‘yicha hokim o‘rinbosari lavozimi joriy etiladi
Bu bo‘yicha O‘zbekiston Respublikasi Prezidenti qarori e’lon qilindi.
30-dekabr kuni O‘zbekiston Respublikasi Prezidentining “Atrof-muhitni muhofaza qilish hamda ekologik nazorat sohasidagi davlat organlari faoliyatini tashkil etish chora-tadbirlari to‘g‘risida”gi qarori e’lon qilindi.
Unda Ekologiya va atrof-muhitni muhofaza qilish davlat qo‘mitasining yangilangan asosiy vazifalari belgilab berilgan. Jumladan, qo‘mita tomonidan 2022-yil 1-dekabrga qadar Ekologik kodeks loyihasini ishlab chiqish va belgilangan tartibda Vazirlar Mahkamasiga kiritish vazifasi yuklatilgan.
Yangilik sifatida 2022-yil 1-martdan boshlab ko‘p kvartirali uy-joy mulkdorlariga ular egaligidagi bino va inshootlarga tutash (chegaradosh) bo‘lgan yer uchastkalaridan doimiy foydalanish huquqini berish belgilandi:
davlat organlari, muassasalari va korxonalari, fuqarolarning o‘zini o‘zi boshqarish organlari va ko‘p kvartirali uy-joylar mulkdorlariga ular egaligidagi bino va inshootlarga tutash (chegaradosh) bo‘lgan yer uchastkalari quyidagi shart va majburiyatlar bilan ularga doimiy foydalanish huquqi bilan ajratib beriladi:
yer uchastkalarini obod holda saqlash;
daraxtlar, butalar, boshqa o‘simliklar va nihollarni parvarish qilish va sug‘orish;
yig‘ishtirish-tozalash ishlarini amalga oshirish va chiqindi qutilarini o‘rnatish;
bolalar maydonchalari, o‘tirish joylari (skameykalar), tungi yoritish tizimini o‘rnatish, ta’mirlash va saqlash;
aholi uchun piyoda yo‘laklarini barpo etish, ta’mirlash va lozim darajada saqlash.
Shuningdek, qarorda 1-fevraldan boshlab ekologiya va ko‘kalamzorlashtirish masalalari bo‘yicha hokim o‘rinbosari lavozimini joriy etish ko‘rsatib o‘tilgan:
2022-yil 1-fevraldan boshlab:
viloyatlar va tumanlar (shaharlar) hokimlarining kapital qurilish, kommunikasiyalar va kommunal xo‘jalik masalalari bo‘yicha o‘rinbosari lavozimi tugatilib, qurilish, kommunikasiyalar, kommunal xo‘jalik, ekologiya va ko‘kalamzorlashtirish masalalari bo‘yicha o‘rinbosari lavozimi kiritilsin;
Toshkent shahri va uning tumanlari hokimlarining arxitektura, kapital qurilish, kommunikasiyalarni rivojlantirish masalalari bo‘yicha birinchi o‘rinbosari lavozimi tugatilib, qurilish, kommunikasiyalarni rivojlantirish, ekologiya va ko‘kalamzorlashtirish masalalari bo‘yicha birinchi o‘rinbosari lavozimi kiritilsin.
