Sudan Bosh vaziri iste’foga chiqdi
Bu qaror mamlakatda ro‘y berayotgan siyosiy notinch vaziyat bilan bog‘liq.
Sudandagi notinch siyosiy vaziyat fonida mamlakat Bosh vaziri Abdulla Hamduk iste’foga chiqishini ma’lum qildi. Bu haqda Euronews.com xabar qilmoqda.
Siyosatchiga ko‘ra, so‘nggi bir oy davomida o‘tish davri rahbariyatida jiddiy qarama-qarshiliklar yuzaga kelgan.
Hamduk 2019-yil avgustdan beri Sudan hukumatini boshqarib kelgan. O‘tgan yilning oktyabr oyida harbiylar vazirlar mahkamasi rahbarini hibsga olib, hukumatni iste’foga chiqarib, buni fuqarolar urushining oldini olish zarurati bilan izohlagan edi. Ammo bu qaror aholining ommaviy noroziligiga sabab bo‘ldi va noyabr oyining oxirida Hamduk yana vazirlar mahkamasiga boshchilik qildi.
Biroq muxolif kuchlar bu murosani harbiy to‘ntarishni qonuniylashtirish yo‘li deb hisobladi va noroziliklar to‘xtamadi.
Avvalroq Gruziyaning sobiq prezidenti Mixail Saakashvili kasalxonadan qomoqxonaga qaytarilgani xabar qilingandi.
Nasiba To'xtayeva
