Nukusda daraxtlar nega kesildi?
Mazkur xabar yuzasidan Zamon.uz sayti Qoraqalpog‘iston Respublikasi Ekologiya qo‘mitasi matbuot kotibi Ulbosin Mirzanazarova bilan bog'landi.
Kuni kecha ijtimoiy tarmoqlarda Nukus — Taxtako‘pir aylanma yo‘li yoqasidagi 300 dan ziyod daraxt kallaklab tashlangani haqida videoxabar tarqaldi.
Matbuot kotibi Ulbosin Mirzanazarovaning aytishicha, Nukus shahar inspeksiyasi va “Qoraqalpoq yo‘lko‘kalam” unitar korxonasi mutaxassislari tomonidan joyiga chiqib o‘rganilgan.
Olib borilgan o‘rganish ishlari natijasiga ko‘ra, “Qoraqalpoq yo‘lko‘kalam” unitar korxonasi mutaxassislari (arborist) tomonidan 4R-176 “Nukus — Chimboy — Taxtako‘pir” yo‘li 14 kilometridagi daraxtlarga 2021-yil oktabr oyi oxirlarida “Yashil makon” umummilliy loyihasi asosida belgilangan rejasiga ko‘ra ushbu “Taslaq” MFY hududini obodonlashtirish va daraxtlarga (qayrog‘och) shakl berish ishlari olib borilgan.
Shuningdek, O‘zbekiston Respublakasi Fanlar Akademiyasi Qoraqalpog‘iston bo‘limi Qoraqalpoq tabiiy fanlar ilmiy-tadqiqot instituti mutaxassislari tomonidan daraxtlarga shakl berish ishlari to‘g‘ri olib borilganligi to‘g‘risida xulosa berilgan.
Munojat Valiyeva
