Olib qochilgan avtomashinani 13 ming AQSH dollariga pullagan o‘g‘irilar ushlandi
Ularga nisbatan jinoyat ish qo‘zg‘atilgan.
O‘zbekiston tumani Tadbirkor ko‘chasida yashovchi 57 yoshli M.A.ning yashash xonadoni oldida qarovsiz qoldirilgan “Laсetti-2” rusumli avtomashinasi nomaʼlum shaxslar tomonidan olib qochilgani haqida O‘zbekiston tuman IIBga murojaat kelib tushgan. Shuningdek, avtomashina yukxonasida 20 million so‘m, saloni ichida 500 AQSH dollari hamda 2 million so‘m pullari bo‘lgani to‘g‘risida maʼlum qilingan.
Olib borilgan tezkor-qidiruv ishlari natijasida, ushbu jinoyatni O‘zbekiston tumanida yashovchi 40 yoshli O.S. hamda 25 yoshli S.A.lar sodir etgani aniqlangan.
Ular jinoiy rejaga asosan jabrlanuvchiga tegishli “Lacetti-2” rusumli avtomashinani olib qochib, Namangan shahri Mashhur ko‘chasida yashovchi 31 yoshli P.J.ga avtomashinani 13 ming AQSH dollariga sotishga kelishganliklarini va ushbu pullardan ming AQSH dollarini olishgani maʼlum bo‘lgan.
Fuqaro P.J.dan jabrlanuvchi tegishli bo‘lgan “Lacetti-2” rusumli avtomashina ashyoviy dalil tariqasida rasmiylashtirib olingan.
Mazkur holat yuzasidan O‘zbekiston tumani IIB huzuridagi Tergov bo‘limi tomonidan O.S. va S.A.larga nisbatan Jinoyat kodeksining 267-moddasi 2-qismi “b” bandi bilan jinoyat ishi qo‘zg‘atilib, tergov harakatlari olib borilmoqda.
Tergov jarayonida avtomashinada bo‘lgan pullar va transport vositasi olib qochilishi bilan bog‘liq barcha holatlarga qonuniy baho beriladi.
Avvalroq, Andijon tumanidan avtomashina olib qochgan shaxs Namangan shahridan ushlangani hamda Namanganda “moyka” xodimi yuvish uchun qoldirilgan “Malibu”ni olib qochgani haqida xabar berilgandi.
Munojat Valiyeva
