Endi 3 oydan ortiq bo’sh turgan obyektlar ijaraga beriladi yoki sotuvga chiqariladi
Prezident boshchiligidagi videoselektorda xususiylashtirish borasidagi ishlar tanqidiy muhokama qilindi.
Bugun, 20 yanvar kuni Prezident Shavkat Mirziyoyev raisligida davlat mulkini xususiylashtirish bo‘yicha joriy yilda amalga oshiriladigan ishlar yuzasidan videoselektor yig‘ilishi bo‘lib o‘tdi.
Yig‘ilishda sohadagi ishlar ahvoli tanqidiy muhokama qilingan. Jumladan, tarmoq va hududlarda samarasiz ishlatilayotgan 2 mingta ob’yekt borligi, viloyat hokimliklari balansidagi 170 ga yaqin bo‘sh ob’yekt yillar davomida sotilmay turgani aytilib, bu borada sustkashlikka yo‘l qo‘ygan rahbarlarga intizomiy choralar ko‘rilishi belgilandi. Shuningdek, ayrim rahbarlar egallab turgan lavozimidan ozod etildi.
Yig‘ilishda joriy yilda sohadagi ishlarni faollashtirib, natijadorlikni ikki barobar oshirish zarurligi ta’kidlanib, bugungacha savdoga qo‘yilgan 33 mingta yer uchastkasini mulk huquqi asosida sotish, shuningdek, 1 iyulga qadar yana 25 mingta maydonni auksionga chiqarish vazifasi qo‘yildi. Bundan tashqari, yo‘l, transport, neft-gaz, energetika, avtomobilsozlik tarmoqlariga qarashli 266 ta korxonani alohida yondashuv asosida savdoga chiqarish kerakligi aytildi.
"Hali ko‘plab tarmoq rahbarlari tizimidagi nosohaviy korxonalarni samarasiz ishlatmoqda. Yirik tarmoqlarda 480 ta korxonadagi davlat ulushini to‘liq xususiy sektorga berish mumkin", – dedi Shavkat Mirziyoyev.
Shundan kelib chiqib, Bosh vazirga “O‘zavtosanoat”, “O‘zbekiston temir yo‘llari”, “O‘zbekneftegaz”, “Hududiy elektr tarmoqlari” kabi tarmoqlardagi tegishli ob’yektlarni to‘liq xatlovdan o‘tkazib, ularni xususiylashtirish bo‘yicha taklif kiritish topshirildi.
Bundan buyon, uch oydan ortiq bo‘sh turgan ob’yekt ijaraga berilishi yoki sotuvga chiqarilishi shartligi belgilandi. Davlat aktivlari agentligiga davlat ulushi bor korxonalarning ijara shartnomalarini ochiq-oshkora ro‘yxatga olish va onlayn nazorat qilish tizimini yo‘lga qo‘yish bo‘yicha topshiriq berildi.
