Hokim yordamchilari va yoshlar yetakchilari mahalladagi islohotchi bo‘ladi – Prezident
Shavkat Mirziyoyev Toshkent shahrida mahallabay ishlash tizimini tashkil etish bo‘yicha yig‘ilish o‘tkazdi.
Bugun, 21-yanvar kuni Prezident Shavkat Mirziyoyev Toshkent shahridagi bunyodkorlik ishlarini ko‘zdan kechirib, poytaxtda mahallabay ishlash tizimini tashkil etish bo‘yicha yig‘ilish o‘tkazdi.
Prezident tashrif buyurgan obyeklardan biri – Yunusobod tumanida qurilayotgan Tashkent Central Park majmuasi bo‘lib, u yerda besh yulduzli mehmonxona, biznes ofislar, konferensiya zali, savdo shoxobchalari va restoranlardan iborat 15 qavatli yangi bino barpo etiladi.
Davlat rahbari Olmazor ko‘chasida barpo etilayotgan Tashkent city mall majmuasini ham borib ko‘rdi. Bu yerda 29 qavatli mehmonxona, 30 qavatli biznes markazi, 4 qavatli savdo-ko‘ngilochar shoxobchalar binosi bo‘ladi. Ularning qurilishi jadal davom etmoqda va 2023 yilgacha ishga tushirilishi kutilmoqda.
Shuningdek, Prezident Toshkent shahar hokimligida barpo etilgan vaziyatlarni boshqarish markazi bilan tanishdi. Ushbu markaz aholiga zamonaviy xizmat ko‘rsatish maqsadida tashkil etilgan bo‘lib, elektr energiyasi, tabiiy gaz, suv va issiqlik ta’minoti, yo‘l, transport, jamoat xavfsizligi kabi 60 dan ortiq soha idoralarining billing tizimi va portallari bilan integrasiya qilingan. Bu orqali mazkur sohalardagi ma’lumotlar, barcha mahalla va ko‘chalaridagi holat geolokasiya orqali yaqqol ko‘rinib turadi. Tumanlarga biriktirilgan mutaxassislar buni onlayn rejimda kuzatib boradi va zarur paytda tezkor xizmat ko‘rsatadi.
Ayni shu yerda mahallabay ishlashni tashkil etish bo‘yicha yig‘ilish o‘tkazildi. Toshkent shahrining 579 ta mahallasida hokim yordamchilari va yoshlar yetakchilari faoliyat boshlagan bo‘lib, Prezident o‘z nutqida ularning faoliyatiga ham to‘xtalib o‘tgan.
“Bu ikki tizim vakillari, ya’ni hokim yordamchilari va yoshlar yetakchilari mahalladagi islohotchi bo‘ladi. Aholi hayotini yaxshilash, tadbirkorlikni rivojlantirish, yoshlarni kasbga o‘rgatib, ishga joylashtirish masalalarida sizlardan umidimiz katta”, – dedi Shavkat Mirziyoyev.
Yig‘ilishda, shuningdek, mutasaddilarga qayerda qanday sohani rivojlantirish, ishsiz aholini qaysi kasblarga o‘qitish bo‘yicha har bir mahallaning iqtisodiy asoslarini ishlab chiqish topshiriqlari berilgan.
