Borib ko‘rish shart bo‘lgan 5 shahar

 

Turkiyaning ommabop www.tv100.com veb-saytida taniqli turk tarixchisi, professor Ilber O‘rtaylining "Ko‘rmasdan turib hayotdan o‘tmang" (Görmeden ölmeyin) sarlavhali maqolasi eʼlon qilindi.

 

Maqolada inson hayoti davomida borib ko‘rishi shart bo‘lgan dunyodagi beshta shahar haqida maʼlumot berib o‘tgan. Eʼtiborlisi, turk tarixchisi tuzgan ro‘yxatda O‘zbekistonning ikkita shahri – Samarqand va Buxoro kiritilgan.

 

Materialda jahon tamadduniga ulkan hissa qo‘shgan qadimiy shaharlardan biri — Samarqand 2001 yilda YUNESKO tomonidan Jahon merosi ro‘yxatiga kiritilgani taʼkidlangan.

 

"Shaharning muhtasham inshootlari, muzeylari, masjid va madrasalari har qanday didi nozik sayyohni ham hayratga soladi, – deb yozadi muallif. — Ming yillar davomida forslar, arablar va turkiy qavmlar hukmronligi ostida bo‘lgan Samarqand o‘ziga xos madaniyatlar chorrahasini o‘zida ifodalagan”.

 

Professor Ilber O‘rtayli o‘z maqolasida Buxoro shahrini ham alohida eʼtirof etgan.

 

"O‘zbekistonning eng muhim madaniy markazlaridan biri bo‘lgan Buxoroning har go‘shasidan tarix ifori ufurib turibdi. Makka va Quddusdan keyin eng muhim islom markazlaridan biri bo‘lgan ushbu qadimiy kent meʼmoriy inshootlari, karvonsaroylari, masjid va madrasalari bilan ziyoratchilarni kutmoqda", – deb yozadi u.

 

Maqolada Florensiya, Rim va Quddus shaharlarini ham borib ko‘rish tavsiya etilgan.