Men stansiya yonib ketishidan qo‘rqdim – Shavkat Mirziyoyev
Prezident ommaviy elektr o‘chgan kun haqida gapirdi.
O‘zbekiston prezidenti Shavkat Mirziyoyevning haftalik faoliyatiga bag‘ishlangan "Menimcha" loyihasining uchinchi soni efirga uzatildi. Unda prezident O‘zbekistonda elektr ta’minotida uzilish bo‘lgan birinchi tunni qanday o‘tkazganini gapirib berdi:
"Birinchi OAVdan odamlarni ogohlantirishni so‘radim, chunki xalq sarosimaga tushib qolishi mumkin edi. Metrodan qancha odam chiqarildi, tog‘dan necha kishi olib chiqildi, nechta svetofor ishlayapti, qayerda “GAI” turibdi, telefon nima bo‘ldi – bular haqida har daqiqa xabar berdik. Hammani “baqirtirdim”, baqiringlar dedim. Hech kim uxlagani yo‘q kechasi, birorta odamni yo‘qotmaylik deb harakat qildik.
Bu juda katta ofat bo‘ldi, shunchaki hisoblagichni ochib tuzatadigan avariya emas. Hamma narsani o‘chirishimizga to‘g‘ri keldi. Men stansiya yonib ketishidan qo‘rqdim. Sirdaryodagi stansiya yonib ketgan, 1982 yoki 1983 yil edi. Mana shunday avariya bo‘lgan, oltita stansiyaning hammasi yonib ketgan. Shu sabab Bosh vazir bilan doimiy aloqada bo‘ldim, bir kunda qancha sochimiz oqardi".
