Olisdagi turfa taqdirlarni tutashtirgan baxt
O‘zbekistonlik qizni sevib qolgan gollandiyalik kuyov yurtimizda qolishni lozim topdi.
Gulsara Ashurova o‘zining o‘zbekona lutfi, chiroyi, odobi bilan xorijlik erkakning yuragini zabt etdi. Qolaversa, uning muhabbati turmush o‘rtog‘ini O‘zbekistonda qolishiga sababchi bo‘ldi.
— Men asli buxorolikman. Sobiq turmush o‘rtog‘im bilan o‘zaro kelishmovchilik sabab ajrashib ketganmiz. Undan bir o‘g‘lim bor. Ikkinchi turmush o‘rtog‘im gollandiyalik George bilan 2020 yil tanishdik. Meni talabalar shaharchasida kichkinagina “atelye” ochgan edim. Uni yana-da kengaytirish maqsadida yurist maslahatiga borganman. Yurist oldiga George ham biznes ochish uchun kelgan bo‘lgan. Biz o‘sha yerda tanishib qolganmiz. Keyinchalik biznes masalasida savollar bilan murojaat qildim. Ish yuzasidan ko‘rishib, uchrashib turdik. 2021 yil ular meni "qo‘limni so‘radi". Unga musulmon ekanligimni aytgan. Ular esa musulmon diniga qiziqishlari baland ekani va hurmat qilishini aytgan. Turmush o‘rtog‘im meni olib ketaman demadi, aksincha, shu yerda qolaman, dedi. Shundan so‘ng taklifiga rozi bo‘lganman. Ularga O‘zbekistonning muhiti, madaniyati, milliy taomlari va mehmondo‘stligi yoqadi. Biz oilada ingliz tilida gaplashamiz. Hozirda turmush o‘rtog‘im o‘zbek tilini o‘rganyapti.
George Sholte, Gulsara Ashurovaning turmush o‘rtog‘i
— Menga o‘zbeklarning urf-odati, turmush-tarzi juda yoqdi. O‘zbek adabiyotiga qiziqishim yuqori. Shu sabab, Gollandiyaga ketmay, shu yerda qolishga qaror qildim. Ota-onam Ispaniyada yashaydi. Ularga shu yerda uylanishimni aytdim. Avvaliga ular hayron qolishdi. So‘ng baxt tilashdi.
Gulsaraning uyiga o‘zim sovchi bo‘lib bordim. Otasidan qo‘lini so‘raganimda musulmon dinini qabul qilsamgina rozi bo‘lishini bildirdi. Gulsaraga bo‘lgan sevgim sabab musulmon dinini qabul qildim. Menga o‘zbekcha Jo‘ravoy degan ism berishdi. Biz nikoh o‘qitib, oila qurdik.
O‘zbek milliy taomlarni pishirish yoqadi. Hozirda buni o‘rganyapman. Biz baxtlimiz.
Bugun bu yosh oila millati va hayot tarzi boshqa-boshqa bo‘lsa-da, oila deb atalmish qo‘rg‘onni muqaddas bilib, baxtli hayot kechirmoqda.
Munojat Valiyeva
