"Yangi O‘zbekiston" bog‘i yopildi

 

Ijtimoiy tarmoqlarda “Yangi O‘zbekiston” bog‘ining yo‘laklaridagi cho‘kishlar, yoriqlar yuzaga kelgani va bog‘ning markazida qad rostlagan “Istiqlol” majmuasiga zarar yetgani aks etgan fotolavhalar tarqaldi. 

 

Maʼlumot uchun: “Yangi O‘zbekiston” bog‘i Mustaqiligimizning 30 yilligi munosabati bilan bunyod etilgan bo‘lib, uning tantanali ochilish marosimi 31 avgust kuni o‘tkazilgan. Bog‘ning dizayni ulkan daraxtning besh novdasini aks ettiradi. Shuningdek, unda O‘zbekistonning 3 ming yillik tarixi, ajdodlarning buyuk merosi, o‘zbek xalqining milliy qadriyatlari o‘z ifodasini topgan. 

 

Internet tarmoqlarida tarqalgan holat yuzasidan borganimizda, bog‘ yopilganiga guvoh bo‘ldik. 

Bu hududda o‘rnatilgan yangi yil archasi va bezaklar olingandan so‘ng tozalash ishlari bilan bog‘liqligi maʼlum qilindi. 

 

—  O‘ninchi yanvardan beri bog‘ yopiq, ichkarida faqat tozalov ishlari bo‘lyapti. Buzilgan joylar yoki ularni tuzatish haqida eshitmadik biz, dedi bog‘ qo‘riqlash xizmati xodimi. 

 

Bog‘ atrofini tozalovchi farrosh ayoldan vaziyat haqida so‘raganimizda, u bunday holatga ko‘zi tushmagani, bog‘ning tozalash ishlari uchun yopilgani va qayta rekonstruksiya ishlari haqida maʼlumoti yo‘qligini aytdi.

 

— Yer cho‘kib qolgan joylar bor, ammo uni joyida to‘g‘rilab ketishadi. Lekin men monumentning ranglari ko‘chib tushayotgani haqida bilmayman. Eshitmadim, deydi farrosh ayol. 

 

Muhokamalarga sabab bo‘layotgan vaziyatga oydinlik kiritish va masʼullardan maʼlumot olish uchun Toshkent shahar hokimligi bilan bog‘landik. Rasmiylar bog‘ning bugungi muhokamaga sabab bo‘layotgan ahvoli haqida izoh berishlari uchun rasmiy xat yuborishimiz va maʼlum vaqt o‘tgandan keyin maʼlumot berishlarini aytishdi. Biz esa holat yuzasidan rasmiylar izohini kutib qolamiz.

 

Ziyoda Muhammadova,  Oybek Shukurov