Metropolitenning ikki bekat oralig'ida poyezd to'xtab qoldi
Voqea metroning “Chilonzor” yo’nalishida sodir bo’lgan.
Bugun, 5-fevral kuni Toshkent metropolitenining Chilonzor yo’nalishida harakatlanayotgan poyezd “Xalqlar do’stligi” va “Milliy bog’” bekatlari oralig’ida texnik nosozlik sabab to’xtab qolgan.
Rasmiylarning xabar berishicha, mazkur voqea soat 19.27da sodir bo’lgan. Shu vaqt mashinist kerakli chora-tadbir ko’rib, harakat tarkibini “Milliy bog’” bekatiga olib kelgan va yo’lovchilarni tushirgan. Ushbu poyezdga yordam ko’rsatish maqsadida keyingi navbatda harakatlanayotgan poyezd ham yo’lovchilarni “Milliy bog’” bekatida qoldirib, ta’mir uchun “Chilonzor” elektrdeposiga yo’naltirilgan.
“Texnik nosozlik sabab yuzaga kelgan noqulayliklar uchun uzr so‘raymiz” – deyilgan “Toshkent metropoliteni” DUK xabarida.
Avvalroq “Kosmonavtlar” metro bekatida kuchli yong‘in chiqqani xaqidagi xabar bo‘yicha rasmiy izoh berilgandi.
Javohirbek TURSUNOV
