Qashqadaryoda “Maydanak” turistik zonasi tashkil etiladi
Loyihada 3 yulduzli mehmonxona va sog‘lomlashtirish majmualari qurish ham rejalashtirilgan.
Viloyatning Qamashi tumanida “Maydanak” turistik-rekreatsion zonasi tashkil etiladi. Bu haqda O’zbekiston Respublikasi turizm va sport vazirligi xabar berdi.
Ma’lum qilinishicha, hozirda Qarshi shahridan 176 km uzoqlikda joylashgan XIV asr ziyoratgohi va masjidi bo‘lgan “Langar ota” hamda “Maydanak” observatoriyasi hududigacha bo‘lgan yo‘l, elektr taʼminoti, suv va oqova suv infratuzilmasi o‘rganilib, tegishli loyiha ishlab chiqilmoqda.
Mutaxassislar Maydanak tog‘larining 7900 gektar archazor hududlarida o‘tov, "camping", "glamping", eko-uylar, yengil konstruksiyali konteynerlar joylashtirishni muhokama qilishdi.
Bundan tashqari, Ko‘kbuloq, O‘rtadara, Chuqurqishloq, Kattao‘ra, Bog‘obod qishloqlarida 100 dan ortiq mehmon uyi barpo etish, ko‘rsatiladigan xizmatlarni diversifikatsiyalash orqali hududda “Mountain treck” “Mountain bike” va ekstremal turizm xizmatlari rivojlantirish, shu bilan birga, osma dor yo‘li, qurish rejalashtirilgan.
