Shavkat Mirziyoyev yangi qurilish loyihalari bilan tanishdi
Taqdimotda Toshkent shahrini yondosh hududga kengaytirish, yangi quriladigan mavzelarni transport xizmatlari bilan ta’minlash bo‘yicha loyihalar ko‘rib chiqildi.
Bugun, 7-fevral kuni Prezident Shavkat Mirziyoyev qurilish loyihalari taqdimoti bilan tanishdi.
Taqdimotda Samarqandda yangidan barpo etilayotgan Imom Buxoriy majmuasining ichki va tashqi ko‘rinishiga oid chizmalar ko‘rib chiqildi. Loyihaga ko‘ra, majmua devorlari milliy naqshlar, pardozbop toshlar bilan sayqallanadi. Uning devorlariga qadimiy uslubda Qur’oni karim suralari va hadislar yoziladi.
Urganch shahrida qurilishi rejalashtirilgan Al-Xorazmiy shaharchasining loyihasi taqdimot qilindi. Unga ko’ra, shaharchada universitet, maktab va bog‘cha, IT park, fan va madaniyat markazlari, sport majmuasi barpo etiladi. Markazda allomaning haykali o’rnatiladi.
Shuningdek, Urganch shahridagi Jaloliddin Manguberdi majmuasi yonida ming o‘rinli san’at saroyi bunyod etish ham mo‘ljallangan. U yerda Xorazm lazgisi an’analarini saqlash, o‘rganish va keng yoyish uchun zamonaviy sharoit yaratiladi.
Taqdimotda O‘zbekiston Respublikasi Qurolli Kuchlari Harbiy tibbiyot akademiyasi yangi uchun o‘quv va davolash binolari, yotoqxona, xizmat uyi qurish, mavjud obyektlarni ta’mirlash va hududni obodonlashtirishga oid loyihalar haqida axborot berildi.
Bundan tashqari, Toshkent viloyatida va poytaxtda amalga oshiriladigan qurilish loyihalari haqida ma’lumot berildi.
Jumladan, Toshkent shahrining Yashnobod tumanida Olimpiya shaharchasi qurilishi rejalashtirilgan. 160 gektarni egallaydigan mazkur shaharchada universal stadion, ochiq va yopiq sport majmualari, yotoqxona, mehmonxona, Chirchiq daryosida eshkak eshish havzasi barpo etiladi.
Toshkent viloyatining Bo‘stonliq tumanidagi “Chorvoq” turistik-rekreatsion zonasida Chorvoq suv ombori va Chirchiq daryosi bo‘yida ekoturizm ob’yektlari barpo etiladi.
Prezident loyihalarni takomillashtirish va sifatli qurish yuzasidan ko‘rsatmalar berdi.
