Andijonda o’qituvchilar ta’lim sifatining pastligi uchun ota-onalardan uzr so’rashdi
Bunga ularni tuman XTB mas’ullari majburlagani aytilmoqda.
Marhamat tumanidagi maktablardan birida o‘qituvchilar o‘quv muassasasida ta’lim sifati, o‘quvchilarning oliygohlarga kirish ko‘rsatkichi pastligi uchun ota-onalar oldida tik turib uzr so‘rashgan.
Kun.uz manbasining xabar qilishicha, bunga tuman xalq ta’limi bo‘limi mudiri va hokim yordamchisi mas’ul bo‘lgan va 72-IDUM o‘qituvchilari ota-onalar qarshisida kechirim so‘rashga majbur qilingan. Bundan tashqari, shu kabi yig‘ilishlar Marhamat tumanidagi 9-, 27-, 43-maktablarda ham o‘tkazilgan.
Holat yuzasidan XTV matbuot kotibi munosabat bildirib, o‘qituvchilarni obro‘sizlantirishga sababchi bo‘lgan mutasaddilarga chora ko‘rilishini ma’lum qilgan.
“Bu harakat qanday maqsadda amalga oshirilgani menga qorong‘i, lekin aybdorlar albatta javob berishi kerak. Shu o‘rinda men o‘qituvchilardan o‘z qadr-qimmatlarini yerga urishga yo‘l qo‘ymasliklarini so‘rab qolaman. Sizning bu darajada boshingizni yerga qaratishga hech kimning haqqi yo‘q!”, deyiladi rasmiy bayonotda.
Shuningdek, Milliy mass-mediani qo‘llab-quvvatlash va rivojlantirish jamoat fondi Vasiylik kengashi raisi ham voqeaga munosabat bildirib, buning uchun viloyat hokimi uzr so’rashi kerakligini aytib o’tgan.
“Andijonda o‘qituvchilar ota-onalar oldida bosh egib, uzr so‘rashga majburlangani uchun viloyat hokimi Shuhrat Abdurahmonovning shaxsan o‘zi barcha ustozlardan uzr so‘rashi kerak”, deb yozadi Komil Allamjonov.
