11-fevral — Xalqaro ilm-fan sohasidagi xotin-qizlar kuni
O‘zbekistondagi xotin-qizlar orasida bugun 6 nafar akademik, 514 nafar fan doktorlari va professorlar faoliyat yuritmoqda.
Ayollar va qizlarning ilm-fan bilan to‘laqonli foydalanishlariga teng imkoniyatlar yaratilishi, shuningdek, xotin-qizlarning huquqlari va imkoniyatlarini kengaytirish maqsadida BMT Bosh Assambleyasi tomonidan qabul qilingan "Taraqqiyot maqsadlaridagi fan, texnika va innovatsiyalar" to‘g‘risidagi rezolyutsiyada 11-fevral – Xalqaro ilm-fan sohasidagi xotin-qizlar kuni deb e’lon qilingan.
2021-yilning 23-yanvar kuni Innovatsion rivojlanish vazirligida qizlar uchun eng yirik xalqaro texnologik tanlov – Technovation Girls Uzbekistan dasturining yangi mavsumi ochildi.
Ayni paytda mamlakatimiz xotin-qizlari orasida 6 nafar akademik, 514 nafar fan doktorlari va professorlar, 4780 nafar fan nomzodlari hamda dotsentlar, minglab yosh tadqiqotchilar, katta ilmiy izlanuvchi xodimalar faoliyat ko‘rsatmoqda.
TDTUning Elektronika va avtomatika fakultetida 46 yildan beri faoliyat yuritayotgan O‘g‘iloy Qurbonova o‘z loyihalari va ixtirolari bilan ko‘pgina muvaffaqiyatga erishgan.
"Maktab, akademik litsey va kollejlar uchun fizika kursi bo‘yicha yangi turdagi o‘quv - laboratoriya qurilmalar turkumini yaratish va ularni ishlab chiqarishni yo‘lga qo‘yish bo‘yicha ixtirolarni amalga oshirganman. Olima ayollar 100 taligida loyiham bilan qatnashdim va bu ixtiro moliyalashtirildi".
Yaqinda Oliy Majlis Senatining Xotin-qizlar va gender tenglik masalalari qo‘mitasi Mahalla va oilani qo‘llab-quvvatlash vazirligi bilan hamkorlikda “Hududning 100 nafar ixtirochi ayoli” haftaligini tashkil etish va o‘tkazish bo‘yicha tashkiliy qo‘mita yig‘ilishi o‘tkazildi.
Unda Qoraqalpog‘iston Respublikasi, viloyatlar va Toshkent shahrida 100 nafardan ixtirochi ayollarini aniqlab, ular bilan istiqbolda manzilli va maqsadli ishlar amalga oshirilishi rejalashtirilmoqda.
