Kutilmagan tayinlov: Vazir viloyat IIBga boshliq bo‘ldi
Mahalla va oilani qo‘llab-quvvatlash vaziri Rahmat Mamatov Samarqand viloyati IIB boshlig‘i etib tayinlandi.
Bu haqda viloyat hokimligi axborot xizmati xabar berdi.
Unga ko‘ra, Shavkat Rahmonov boshqa ishga o‘tgani sababli viloyat IIB boshlig‘i lavozimidan ozod etilgan. Ichki ishlar vazirining buyrug‘i bilan Rahmat Mamatov Samarqand viloyati ichki ishlar boshqarmasi boshlig‘i lavozimiga tayinlangan.
Maʼlumot uchun: Mamatov 1967 yilda Qashqadaryo viloyati Qarshi tumanida tug‘ilgan. Maʼlumoti oliy, huquqshunos, polkovnik harbiy unvoniga ega. Mamatov Qarshi davlat pedagogika instituti hamda IIV akademiyasini tamomlagan.
U Farg‘ona viloyati IIB boshlig‘i birinchi o‘rinbosari, Xorazm viloyati IIB boshlig‘i, ichki ishlar vaziri o‘rinbosari, ichki ishlar vazirining birinchi o‘rinbosari, Navoiy viloyati Xalq qabulxonasi mudiri, Farg‘ona viloyati IIB boshlig‘i, “Mahalla” xayriya jamoat fondi raisi lavozimlarida ishlagan.
U 2020 yil 18 fevraldan beri mahalla va oilani qo‘llab-quvvatlash vaziri lavozimida ishlab kelayotgan edi.
