Shavkat Mirziyoyev Yangihayot tumanidagi “Toshkent indeks” savdo va xizmat ko‘rsatish majmuasi bilan tanishdi
Loyihaning birinchi bosqichini Navro‘z bayrami arafasida ishga tushirish rejalashtirilgan.
Ushbu majmua 72 gektar bo’lib, bu yerda qariyb 1 trln 300 mlrd so‘m evaziga savdo do‘konlari, logistika va ekspo markazlari, mehmonxona, oshxona barpo etilmoqda. Ularda jami 13 mingta yangi ish o‘rni tashkil etiladi.
Shu yerda Yangihayot va Sergeli tumanlarini iqtisodiy-ijtimoiy rivojlantirish masalalari yuzasidan yig‘ilish o’tkazilb, joriy yilgi vazifalar ko‘rsatib o‘tildi.
Bu yil Yangihayot tumanida jami qiymati 3,8 trillion so‘m bo‘lgan 61 ta loyihani amalga oshirib, 26 mingta yangi ish o‘rni yaratish rejalashtirilgan.
“Yangi shahar” loyihasi doirasida 5 million kvadrat metr uy-joy, ko‘plab ijtimoiy soha ob’yektlari quriladi. 430 ming aholi uy-joy bilan ta’minlanadi. “Yo‘ldosh” mavzesidagi eski yog‘och uylar buzilib, ularning egalarini zamonaviy turarjoylarga ko‘chirish dasturi boshlanadi.
Aholi zich mahallalarda uchta bolalar bog‘chasi, ikkita maktabda qo‘shimcha bino quriladi. Jamoatchilik fikri asosida aholi muammolarini hal etishga 3,2 milliard so‘m yo‘naltiriladi.
Sergeli tumanida umumiy qiymati 6,4 trillion so‘m bo‘lgan 79 ta investisiya loyihasi amalga oshirilib, 31 mingta doimiy ish o‘rni yaratish mo‘ljallangan. Jumladan, “Alyuteks” korxonasida alyumin profillar, “Rezalit stroy grup” korxonasida elektrokar ehtiyot qismlari ishlab chiqarish yo‘lga qo‘yiladi.
2 ta maktab, 2 ta bolalar bog‘chasi va oilaviy poliklinika quriladi. “Alisher Navoiy” mavzesida Yangi O‘zbekiston massivini qurish ishlari boshlanadi.
Yig‘ilishda Toshkent shahri tumanlarining hokim va sektor rahbarlari so‘zga chiqdi. Hokim yordamchilari ishtirokida iqtisodiy, yoshlar yetakchilari bilan ijtimoiy loyihalarni amalga oshirish rejalari haqida axborot berdi.
