Putin: "Men maxsus harbiy operatsiya o‘tkazishga qaror qildim"
Shuningdek, u ruslarga ham alohida murojaat qilib “kuch adolat va haqiqatda” deb eslatdi.
Rossiya prezidenti Donbassda harbiy operatsiya boshlanganini maʼlum qildi. Prezidentning 24-fevraldagi xalqqa murojaati federal televideniye orqali namoyish etildi.
Vladimir Putinga ko‘ra, Rossiya Federatsiyasi va “Ukrainadagi millatchi kuchlar” o‘rtasida to‘qnashuv bo‘lishi muqarrar. Davlat rahbari Rossiya qo‘shni davlatni bosib olish niyatida emasligini aytgan. Uning taʼkidlashicha, operatsiyadan maqsad Ukrainani qurolsizlantirishdir.
U tashqi kuchlarni Rossiya Federatsiya ishlariga aralashishga urinishdan ogohlantirdi. Davlat rahbari Moskva barcha ssenariylarga tayyor ekanini taʼkidladi.
“Birlashgan Millatlar Tashkiloti Nizomining 51-moddasiga ko‘ra, Federatsiya Kengashining ruxsati bilan men maxsus harbiy operatsiya o‘tkazishga qaror qildim”, — dedi Vladimir Putin “Rossiya 24” telekanali orqali efirga uzatilgan murojaatida.
Prezident, shuningdek, ukrainalik harbiylarga murojaat qildi: “Siz xuntaga emas, xalqqa qasamyod qildingiz. Zudlik bilan qurollaringizni tashlab, uyingizga qaytishingizni so‘rayman”.
Hozirgi paytda Rossiya artilleriyasi Ukrainaning boshqa shaharlari: Kiyev, Xarkov, Berdyansk kabi shaharlariga ham snaryadlar otishni boshladi.
Eslatib o‘tamiz, avvalroq Tramp Putinni aqlli yo‘l tutgani haqida xabar berilgandi.
