Xitoy Rossiyaning Ukrainaga hujumini bosqin deb hisoblamaydi
Rossiyaga nisbatan joriy etilayotgan sanksiyalarni esa qoralaydi.
Xitoy hukumati Rossiyaning Ukrainadagi harbiy amaliyotini bosqinchilik deb tan olmasligini ma'lum qildi va Kremlni tanqid qilishdan tiyilmoqda. Bu haqda Xitoy Tashqi ishlar vazirligi rasmiy vakili Van Venbin izohiga tayanib, Reuters xabar berdi.
Pekin barcha mamlakatlarning hududiy yaxlitligini hurmat qilishini tasdiqladi, biroq Ukraina masalasini “qiyin va alohida tarixiy asosga ega” deb hisoblaydi.
25-fevral, juma kuni bo‘lib o‘tgan brifingda Venbin “Rossiyaning qonuniy xavfsizlik xavotirlarini tushunamiz” deb aytgan.
Shuningdek, Xitoy tomoni Rossiya Federatsiyasiga nisbatan sanksiyalar siyosatini qo‘llab-quvvatlamaydi.
"Sanksiyalar hech qachon muammoni hal qilishning samarali vositasi bo'lmagan. Umid qilamizki, tegishli tomonlar muloqot va maslahatlashuvlar orqali muammolarni hal qilish uchun harakat qilishlari mumkin", - dedi Xitoy TIV vakili.
Avvalroq Gruziya Rossiyaga qarshi sanksiyalarga qo‘shilmasligi ma’lum qilingandi. Bosh vazir Irakliy Gariboshvilining aytishicha, bu Gruziya milliy manfaatlariga ziddir.
Eslatib o'tamiz, dunyoning aksariyat davlatlari Rossiyaning harbiy tajovuzini qoraladi. Qo'shma Shtatlar va G7 davlatlari Kremlga qarshi "tortishuvchi sanksiyalar" bo'yicha kelishib oldi.
