San’atda “ko‘rinmay qolgan” yulduzlar

 

Qo‘shiq  shunday narsaki, u insonlarni butkul o‘ziga rom etadi. Uning olamida yashagan xonanda esa “mashhurlik shohsupasi”ga yetishish uchun unga mehr berib ijod qiladi. Ijodning parvozi ham aynan shunda. Bugungi qahramonlarimiz ham o‘z vaqtida xit qo‘shiqlari, kliplari va imidjlari bilan muxlislar qalbini zabt eta olgan ijodkorlardir. Ammo shuhrat abadiy bo‘lmaganidek ushbu qahramonlarimiz turli sabablar bilan shou-biznesdan yiroqlasha boshlagan, ba’zilari esa ma’lum va noma’lum sabablarga ko‘ra taqiqga uchragan. 

Ular uchun san’atga yetaklovchi eshiklar yopildi, erkin ijod qilish uchun imkon berilmadi. Zinama-zina pastga qo‘yilgan qadamlar oxir-oqibat ularni biz bilmagan tomonlarga olib ketdi.  Xo‘sh, ularni san’atdan ketishga nima sabab bo‘lgan?

 

Anvar Sanayev, xonanda: 

– Meni ijoddan uzoqlashdim, ammo bu mening xohishim bilan bo‘lmadi.  Radio orqali xonanda Yulduz Usmonovaga bergan ta’rifim uchun  3 yilga ta’qiqga uchradim. Xorijliklar  Yulduz Usmonova deganda O‘zbekistonni, O‘zbekiston deganda esa Yulduz Usmonovani eslashadi deganman. Shu gap  meni san’atimga nuqta qo‘yishini xayolimga ham keltirmagan edim. Yillar o‘tib asta-sekin yana san’atga qaytyapman. 

 

Shoira Otabekova, xonanda:

– Men noma’lum sabablarga ko‘ra taqiqga uchraganman. Haligacha buning sababini bilmasligim qattiq alam qiladi. Shundan keyin san’atdan qattiq ko‘nglim qoldi. O‘sha vaqtlarda otam og‘ir kasallik bilan xastalanib qolganlar. Ularning yonlarida bo‘lib, meni taklif etishgan joylarga borolmadim. Shu ham ba’zilarga qo‘l keldi.

 
Iroda Nosirova, teleboshlovchi:

– Ijodkorni sindirish uchun qattiq zarba berishganda, u achchiq ustida xato qilib qo‘yishi yoki  adashib noto‘g‘ri  yo‘llarga ham kirib qolishi mumkin ekan. Men o‘z vaqtida olgan zarbamdan ana shunday yo‘llarga yarim qadam tashlab, darhol ortga qaytganman. Menga taqiq qo‘yishgan. Shundan so‘ng boshqa sohalarni egallashga harakat qildim.  

 

Jo‘rabek, xonanda:

 – San’atdan ketishimning aniq sababi yo‘q. Shunchaki bir xillikdan qochishga harakat qildim. Men bir muddat o‘zimni san’atdan boshqa joyda ko‘rishni istadim. Ammo san’atning tuprog‘i  kuchli bo‘larkan. Qalbimda baribir san’atni sog‘indim. O‘sha vaqtlari nagadir muxlislarimni bir umrga faqat meniki bo‘lishadi deb o'ylardim, ammo keyinroq adashganimni tushunib yetdim. Bugun sizni olqishlab turgan muxlis ertaga boshqasini tanlab ketarkan. Men ularni yo‘qotdim. Shu ham san’atga qaytmay, yana-da uzoqlashishimga sabab bo‘ldi. Juda xafa bo‘ldim, ammo vaqt o‘tib ularni tushundim va kechirdim. Hozir yana ijodni qayta boshlash arafasidaman.

 

Davron Ergashev, xonanda 

– San’atdan ketishimga oilaviy sharoitim sabab bo‘lgan. Ancha yillik tanaffusdan keyin asta-sekin ijodga qaytyapman. Avvallari ketma-ket qo‘shiqlar chiqaraverardim.  Endi unday emas. Har bir qo‘shiq ustida oylab ishlayman.