Narxlarning oshishi, qashshoqlik bizni kutmoqda – rus deputatlari
240 dan ortiq deputat Rossiyaning Ukrainaga qarshi hujumini qoraladi.
Rus deputatlarining vatandoshlariga qilgan murojaatida Ukrainaga hujum qilish qarorini Putin shaxsan o‘zi qabul qilgani va bu ishni ular so‘zsiz qoralashlari haqida aytib o‘tilgan.
"Vatandoshlar! Biz, xalq tomonidan saylangan deputatlar, Rossiya armiyasining Ukrainaga hujumini so‘zsiz qoralaymiz. Bu misli ko‘rilmagan vahshiylik bo‘lib, uni oqlab bo‘lmaydi.
Hujum qarorini shaxsan Rossiya prezidenti Vladimir Putin qabul qilgan. Ishonchimiz komilki, Rossiya fuqarolari unga bunday mandat bermagan.
Ukraina bilan urush halokatli oqibatlarga olib keladi. Minglab odamlar halok bo‘ladi, yaralanadi va mayib bo‘ladi, ko‘plab ruslar uchun aziz shaharlar vayron bo‘ladi. Mamlakatimizni jahon hamjamiyatining qoralashi, yakkalanib qolishi, narxlarning oshishi, qashshoqlik bizni kutmoqda. Rossiyada yaxshi hayot kechirish umidlari ko‘z o‘ngimizda so‘nib bormoqda”, — deb ta’kidlagan ular.
