AQSH Rossiya bilan Ukraina bo‘yicha aloqa tizimini yaratishni taklif qildi
U Suriyadagi AQSH-Rossiya muloqot kanaliga o‘xshash.
AQSH mudofaa vazirligi Rossiya bilan Ukraina masalasida favqulodda aloqa kanalini ishga tushirmoqchi. Bu haqda Politico xabar berdi.
Nashrning Pentagondagi manbalaridan birining so‘zlariga ko‘ra, bu xatolarning oldini olishga qaratilgan. Amerikaliklar Moskva bilan xuddi Suriyada 2015-yilda yo‘lga qo‘yilgan aloqa tizimiga o‘xshash kanalni ishga tushirmoqchi. Suriyada bu ikki davlat harbiylarining to‘qnashuvini oldini olishga qaratilgan edi. Shu bilan birga, Amerika tomoni Rossiyadan bu taklifga javob olmagan.
Ma’lumot o‘rnida: 24-fevral kuni Rossiya Ukraina sharqida maxsus operasiya boshlashini e’lon qildi. Hozirda mamlakatning turli nuqtalarida janglar ketmoqda. Gʻarb bunga javoban Moskvaga sanksiyalar joriy etdi. Qora ro‘yxatda Putin, RF tashqi ishlar vaziri Sergey Lavrov va boshqa ko‘plab oliy martabali amaldorlar ham bor. 27-fevral kuni Ukraina tomoni Belarusda Rossiya bilan muzokara o‘tkazishga jo‘nab ketdi.
Avvalroq Braziliya Rossiya-Ukraina nizosida neytral qolishi to‘g‘risida xabar berilgandi.
