Bayden Ukrainadagi urushning oldini olishi mumkin edi — Global Times
Shuningdek, muammoning yechimi NATO qo‘lida ekanligi maʼlum qilindi.
Xitoyning Global Times nashri AQSHni Ukrainadagi nizo uchun javobgar sifatida baholadi.
“Ukraina nizosida Vashington alohida javobgar tomon hisoblanadi.
AQSH boshchiligidagi NATO uning hal etilishi kalitini ushlab turibdi. AQSH Kongerssi vakillar palatasi sobiq aʼzosi Tulsi Gabbard ‘Bayden Ukraina NATO aʼzosi bo‘lmasligi kafolatini bersa, Rossiya bilan urushning oldi olinadi‘ degandi.
Uning so‘zlari ayni haqiqat edi. Ammo AQSHning asosiy OAVlari atayin buni inkor qilibgina qolmay, ukrain xalqining fojeasidan foydalandi”, – deyiladi nashrda eʼlon qilingan maqolada.
Shu bilan birga mualliflar Vashington "jamoatchilik fikri bilan urush olib borishni to‘xtatishi lozim"ligini qayd etgan.
"Ukraina masalasida murakkab tarixi va amaliy faktorlar mavjudligi inobatga olinsa, ushbu muammoni soddalashtirish g‘arazli, hatto yovuz maqsadlarni ko‘zlaydi. Rossiya va Ukrainada muzokara olib borish uchun maʼlum niyatlar borligi inobatga olinishi muhim. Siyosiy-diplomatik yechim hali ham mavjud”, – deya taʼkidlangan.
Maqola so‘nggida Vashington beqarorlik manbasi bo‘lishdan ko‘ra,mojaro hal etilishida alohida javobgarlikni zimmasiga olishi kerakligi aytilgan.
Maʼlumot o‘rnida: 24 fevral kuni Rossiya Ukraina sharqida maxsus operatsiya boshlashini eʼlon qildi. Hozirda mamlakatning turli nuqtalarida janglar ketmoqda. G‘arb bunga javoban Moskvaga sanksiyalar joriy etdi. Qora ro‘yxatda Putin, RF tashqi ishlar vaziri Sergey Lavrov va boshqa ko‘plab oliy martabali amaldorlar ham bor.
Eslatib o‘tamiz, avvalroq RF-Ukraina muzokaralari to‘g‘risida maʼlumot berilgandi.
