Yaponiya tarixdan to‘g‘ri saboq chiqarishi kerak — Mun Chje In
Janubiy Koreya prezidenti ikki davlat hamkorligi to‘g‘risida gapirdi.
Koreya Respublikasi ikki tomonlama murakkab munosabatlarga qaramay, Yaponiya bilan muloqotga ochiq. Bu haqda Janubiy Koreya prezidenti Mun Chje In maʼlum qildi.
Prezident bu haqda 1919-yilda yaponiyaga qarshi ko‘tarilgan umummilliy qo‘zg‘olonning 103 yilligi munosabati bilan uyushtirilgan tadbirda gapirgan.
"Seul va Tokio o‘tmishdagi muammolarni chetga surishi va hamkorlik tomon harakat qilishi kerak", — degan Mun Chje In. U, shuningdek, Koreya muloqot uchun ochiqligini, mintaqaviy va global muammolar yechimida birgalikda harakat qilishga tayyorligini bildirgan.
Ammo, uning so‘zlariga ko‘ra, ikki davlat o‘rtasida ishonchli munosabatlar o‘rnatilishi uchun Yaponiya tarixdagi xatolaridan to‘g‘ri xulosa chiqarishi kerak. U Tokioni "o‘tmishga qarashga va uning saboqlarini to‘g‘ri qabul qilish"ga chaqirdi.
Yaponiya va Janubiy Koreya o‘rtasidagi munosabatlar 2018-yildan boshlab sovuqlashgan. O‘shanda Koreya Respublikasi Oliy Sudi Nippon Steel & Sumitomo Metal korporatsiyasini 4 nafar koreyslarni okkupatsiya davrida majburiy mehnatga jalb qilgani uchun kompensatsiya to‘lashi shartligi to‘g‘risida qaror chiqargandi.
Tokio o‘z navbatida sud qarorini inkor qildi va Seulga nisbatan bir qator iqtisodiy cheklovlar joriy etdi.
Eslatib o‘tamiz, avvalroq Yaponiyada AQSH yadro quroli joylashtirilmasligi maʼlum qilingandi.
