Gruziya ham Yevroittifoqqa kirish uchun ariza berdi
Ayni paytda Ittifoq Ukrainaning tashkilotga kirish arizasini ko‘rib chiqishni rasman boshlagan.
Gruziya bosh vaziri Irakliy Gariboshvili mamlakatning Yevropa Ittifoqiga qo‘shilish arizasini imzoladi.
"Bugun Gruziya uchun tarixiy kun... Yevropa Ittifoqiga a'zo bo'lish uchun ariza topshirish Gruziyaning Yevropa integratsiyasi yo'lidagi yana bir muhim qadamdir. Tariximizda yangi sahifa ochadigan bosqich... Gruziya Yevropa davlati.”, dedi Gariboshvili fuqarolarga murojaatida.
Unga ko‘ra, Gruziya Yevropa Ittifoqiga hech qachon bu qadar yaqin bo'lmagan.
“2014-yildan boshlab, Yevropa Ittifoqi bilan assotsiatsiya shartnomasini imzolaganimizdan buyon biz oʻz majburiyatlarimizni izchil bajarmoqdamiz, Yevropa Ittifoqi bilan huquqiy, iqtisodiy va siyosiy sohalarda yaqinlashishda muvaffaqiyatga erishmoqdamiz”, — deya taʼkidlagan Gruziya bosh vaziri.
Eslatib o‘tamiz, Tbilisidan oldin Ukraina tomonidan ham xuddi shunday ariza berilgan edi. 28-fevral kuni Ukraina yetakchisi Vladimir Zelenskiy mamlakatning Yevropa Ittifoqiga a’zoligi bo‘yicha arizani imzoladi va shu kuniyoq YeI uni ko‘rib chiqish jarayonini rasman boshladi.
