Shavkat Mirziyoyev O‘zbekistonda bo‘lib o‘tadigan xalqaro forum bo‘yicha yig‘ilish o‘tkazdi
24-26-mart kunlari Toshkentda xalqaro investitsiya forumi istiqbolli loyihalarining taqdimoti bo‘lib o‘tadi.
Prezident Shavkat Mirziyoyev 10-mart kuni Toshkent xalqaro investisiya forumiga tayyorgarlik masalalari yuzasidan yig‘ilish o‘tkazdi.
Ushbu forum 24-26 mart kunlariga rejalashtirilgan bo‘lib, unda xalqaro tashkilotlar va moliyaviy tuzilmalar, 56 ta davlatdan 1 ming 500 nafardan ziyod yirik investorlar va yuqori martabali mehmonlar qatnashishi kutilmoqda. Xususan, Yevropa tiklanish va taraqqiyot banki, Osiyo tarraqiyot banki prezidentlari, vazirlar, yirik korporasiya va kompaniyalar rahbarlari ishtirok etadi.
Forum doirasida yalpi majlis va shoʻba majlislari, davra suhbatlari, taqdimotlar, brifinglar kabi 40 dan ortiq tadbirlar ko‘zda tutilgan.
Mazkur anjuman mamlakatimiz iqtisodiyoti uchun zarur bo‘lgan istiqbolli loyihalarning taqdimot platformasi bo‘lib xizmat qiladi. Yurtimizdagi imkoniyatlar, xorijiy investorlar uchun yaratilgan sharoitlar va jozibador yo‘nalishlar tanishtiriladi.
Yig‘ilishda forumga tayyorgarlik ishlarining borishi haqida axborot berildi.
Davlatimiz rahbari bunday investisiya forumi O‘zbekistonda birinchi marta o‘tkazilayotganiga e’tibor qaratib, uni yuqori darajada tashkillashtirish bo‘yicha ko‘rsatmalar berdi.
Mamlakatimizning xalqaro biznes hamjamiyatiga ochiqligini namoyish etish, har bir tarmoq va hududning investision salohiyatini ko‘rsatish zarurligi ta’kidlandi. Yirik loyihalarga ilg‘or texnologiyalar va investisiyalarni jalb qilish bo‘yicha aniq natijalarga erishish vazifasi qo‘yildi.
