Ikki yillik tanaffusdan so‘ng O’zbekiston bilan Qozog‘iston o‘rtasida xalqaro avtobuslar qatnovi tiklanmoqda
Shuningdek, Qozog‘iston orqali Rossiyaga avtobus tashuvlari yo‘lga qo‘yilishi mumkin.
16-martdan boshlab O‘zbekiston va Qozog‘iston o‘rtasida ikki tomonlama muntazam xalqaro avtobus yo‘nalishlarida qatnovlar qayta tiklanadi. Bu haqda Transport vazirligi axborot xizmati xabar berdi.
Ma’lum qilishicha, 16-martdan tashuvchilar tomonidan Toshkent – Nursulton, Toshkent – Olmaota, Toshkent – Qizilo‘rda, Toshkent – Turkiston, Toshkent – Irgeli, Chirchiq – Chimkent, Chirchiq – Olmaota yo‘nalishlarida qatnovlarni amalga oshirish rejalashtirilgan.
Shuningdek, hozirda Qozog‘iston Respublikasi orqali Rossiya Federatsiyasi va Qirg‘iziston Respublikasiga tranzit avtobus tashuvlarini tashkil etish yuzasidan muzokaralar olib borilmoqda.
Eslatib o‘tamiz, O‘zbekiston va Qozog‘iston o‘rtasidagi xalqaro avtobus qatnovlari koronavirus pandemiyasi sababli 2020 yil 16 mart kuni to‘xtatilgan edi.
