Yevropada NATOning 140 ming askari bor — Yens Stoltenberg
Shuningdek, alyansning 24 martdagi sammitidan ko‘zlangan maqsad ochiqlandi.
Yens Stoltengberg 24 mart kuni bo‘lib o‘tadigan NATO favqulodda sammitidan ko‘zlangan maqsadni ochiqladi.
Bu haqda “TASS” xabar berdi.
Uning so‘zlariga ko‘ra, Yevropadagi geosiyosiy vaziyat va Rossiyani tiyib turish sammitning asosiy vazifasi sanaladi. Bugun Bryusselda bo‘lib o‘tgan alyansga aʼzo davlatlar mudofaa vazirlari uchrashuvida quruqlik, havo, dengiz, kosmos va kibermakonda kollektiv mudofaani kuchaytirish choralarini ishlab chiqish masalasini ko‘rib chiqish topshirilgan.
Stoltenbergning so‘zlariga ko‘ra, NATO mamlakatlari o‘z xavfsizligi uchun yangi reallikka duch keldi. Shuning uchun “kollektiv mudofaa tizimini qayta yo‘lga qo‘yish hamda uzoqroq muddatga tiyib turish siyosatini qayta ko‘rib chiqish lozim”.
Alyans bosh kotibining taʼkidlashicha, yangi xavfsizlik strategiyasi NATO sharqiy qanotida quruqlikda ko‘proq qo‘shin joylashtirishni nazarda tutadi. Bundan tashqari, havoda ko‘proq samolyotlar paydo bo‘lishi, Havo hujumiga va raketaga qarshi tizimlar joylashtirilishi zarur. Dengizda esa doimiy asnoda aviatashuvchilarning zarbdor guruhlari, suvosti va jangovor kemalarni joylashtirish rejalashtirilgan.
“Tiyib turuvchi kuchlar va qurollarning ko‘paytirilishi o‘z navbatida harbiy xarajatlarning ham oshishini bildiradi. Alyans davlatlari eng kamida YAIMning foizini mudofaaga ajratishi kerak”, – degan Stoltenberg.
Shuningdek, hozirda Yevropada NATOning 140 ming askari borligi maʼlum qilingan. Ulardan 100 mingi AQSH qo‘shinlari, qolgan 40 ming askar bevosita NATO qo‘mondonligi ostida. Ular asosan alyansning sharqiy qanotiga joylashtirilgan.
Avvalroq AQSH Arktikadagi harbiy ishtirokini kuchaytirmoqchi ekanligi to‘g‘risida xabar berilgandi.
