Surxondaryoda YPX xodimiga pora taklif qilgan haydovchi ushlandi
U mast holda avtomobil boshqargan va buning uchun chora ko‘rmaslikni so‘ragan.
20-mart kuni Jarqo‘rg‘on tumanining “Kakaydi” qo‘rg‘onida xizmat olib borayotgan YPX xodimi “Neksiya” rusumli avtomashina haydovchisini to‘xtatadi. O‘zaro suhbatda haydovchining o‘g‘zidan spirtli ichimlik hidi kelayotganini payqagan xodim uni tekshiruvdan o‘tishga taklif qiladi.
Tekshiruv natijasiga ko‘ra, ushbu haydovchining mast ekani tasdiqlanadi. YPX xodimi tomonidan ma’muriy bayonnoma rasmiylashtirilib, Ma’muriy javobgarlik to‘g‘risidagi Kodeksning 291-moddasiga ko‘ra avtomobil vaqtincha saqlash uchun jarima maydoniga qo‘yiladi.
Haydovchi xodimdan tegishli chora ko‘rmasligini so‘ragan va evaziga 300 AQSH dollari miqdorida pul berishni taklif qilgan.
Shundan so‘ng, xodim Surxondaryo viloyati IIB boshlig‘i nomiga bildirgi orqali murojaat qilib, pora taklif qilayotgan fuqaroga nisbatan qonuniy chora ko‘rilishini so‘ragan.
Holat yuzasidan 21 mart kuni o‘tkazilgan tezkor tadbirda haydovchi YPX xodimiga 300 AQSH dollari miqdorida pullarni pora sifatida berayotganda ushlangan.
Hozirda Jarqo‘rg‘on tumani prokuroturasi tomonidan tergovga qadar tekshiruv harakatlari olib borilmoqda.
