Umrini yo‘lda o‘tkazayotganlar

 

Haydovchi Jasurbek Tursunovning umri deyarli ko‘chada o‘tadi. Bir oyning o‘n kunini oilasi, farzandlariga bag‘ishlay oladi. Mana 5 yildirki, uning kunlari yo‘lda o‘tyapti. Har bir ishning o‘ziga yarasha qiyinchiligi bor. Qahramonimiz kasb mashaqqati haqida shunday deydi:

 

“Haydovchilik menga bobomdan meros. Ishim menga yoqadi — bundan faxrlanaman. Shunday kezlar bo‘lganki, yo‘llar yopilib, sovuqda qolib ketganman. Mashinaning ichida ko‘p vaqt qolib ketishga to‘g‘ri kelgan. Ko‘pincha bir oy, ba’zan bundan ham ko‘p, masalan, 45 kunlab yo‘l yuraman. Uyimda esa 1 hafta – 10 kun bo‘laman. To‘g‘ri, qiyin, yaqinlarim, farzandlarimni sog‘inaman. Ular ham meni sog‘inadi. Lekin na iloj, oilani boqish kerak”.

 

Qahramonimiz kasbi orqali ko‘p mamlakatlarda ham bo‘lgan:

 

“Yevropadan boshqa ancha mamlakatlarni ko‘rdim. Turkiya, Rossiya, Gruziya, Ozarbayjon – shular jumlasidan. Odamlar pul sarflab, chet davlatlarga chiqadi. Men esa ishim bahona sayohat qilaman. Mana, bugun kechga yana Turkiyaga yo‘l olaman”.

 

Haydovchilarni qiynaydigan eng katta muammo – uyqu va yo‘lning yomonligi. Ular uzoq safarga otlanganda bu muammoga qanday yechim izlaydi?

“Ertalab yuraman, kech tushishi bilan avtoturargohlarda to‘xtab, albatta, uxlab olaman. Yo‘llar ba’zan muz bo‘ladi: uning ‘kayfiyati’ga qarab yurish juda qiyin. Shunday paytlar bo‘lganki, yukni tezroq eltib berish uchun muz ustida ketishga majbur bo‘lganman. Lekin yo‘lda tavakkal qilish xato. Chunki xato qildingizmi, kechirilmaysiz”.

 

“Fura”dagi masalliqlarni ko‘rib ajablandim. Menimcha, yo‘lda to‘xtab, o‘zlari o‘choq qurib, ovqat qilsa kerak, degan xayolga bordim. Lekin unday bo‘lib chiqmadi:

 

“Kamazda gaz, qozon-tovoq bor. Xohlaganimda, biron joyda to‘xtab, o‘zim ovqat pishiraman. Sovuqda o‘tin terib, o‘choq qidirishim shart emas. Joyi keladi, chegaralarda kunlab navbat kutaman. Shunday paytda ovqat tayyorlab yeyaveraman. Ko‘pincha charchoqni kuchidan erinib, oshxonalarda ovqatlanib ham turaman”.

 

Bizga oddiy va oson tuyilgan kasbning faxrlanarli va biz bilmagan mashaqqatlari bor. Haydovchilarimizni bayram bilan tabriklab, hamisha yo‘llari ravon bo‘lishini tilab qolamiz.

 

Muallif: Ravshana Karimova