Rossiyanning 40 dan ortiq diplomatlari Polshadan “quvilishi” mumkin
Ular josuslikda ayblanmoqda.
Polsha 40 dan ortiq Rossiya diplomatlarini mamlakatdan chiqarib yubordi. Bu haqda “TASS” xabar berdi.
Polsha maxsus xizmatlari vakili Stanislav Jarinning so‘zlariga ko‘ra, Polshadan chiqib ketishi talab qilingan 45 diplomat ro‘yxati shakllantirilgan. Bunga sabab qilib ularning Varshavaga qarshi razvedka faoliyati olib borgani ko‘rsatilgan.
Ushbu maxsus ro‘yxat Polsha ichki xavfsizlik agentligi tomonidan shakllantirilgan va mamlakat TIVga yuborilgan. O‘z o‘rnida, Rossiya elchisi Sergey Andreyev tashqi ishlar vazirligiga chaqirilgan.
Maʼlumotlarga ko‘ra, hozirda RFning Varshavadagi elchixonasida 60 dan ortiq xodim xizmat qiladi. Kreml bu xabarlarga javoban Polsha harakatlari javobsiz qolmasligini maʼlum qildi.
Eslatib o‘tamiz, avvalroq AQSH Rossiya deputatlariga qarshi sanksiya joriy etishi to‘g‘risida xabar berilgandi.
