Shavkat Mirziyoyev Rossiya delegatsiyasini qabul qildi
Uchrashuvda o‘zaro manfaatli hamkorlikni kengaytirish masalalari ko‘rib chiqilgan.
Bugun, 23-mart kuni Prezident Shavkat Mirziyoyev Tatariston Prezidenti Rustam Minnixanov boshchiligidagi Rossiya Federasiyasi delegasiyasini qabul qildi. Bu haqda Prezident matbuot xizmati xabar berdi.
Uchrashuvda O‘zbekiston hududlarining Tatariston bilan o‘zaro manfaatli hamkorligini kengaytirishning amaliy jihatlari ko‘rib chiqilgan.
Ilgari erishilgan kelishuvlarga muvofiq ikki mamlakat yetakchi korxonalari o‘rtasida sheriklik aloqalari va kooperasiya rivojlanayotganining ilk muhim natijalari mamnuniyat bilan qayd etilgan.
Ma’lum qilinishicha, o‘zaro savdo hajmi ortib, nomenklaturasi sifatli kengaymoqda, qator investisiya loyihalari amalga oshirilmoqda. Bugun Toshkent viloyatida yangi “Chirchiq” texnologik parki qo‘shma loyihasiga start berildi.
Gumanitar yo‘nalishda, shu jumladan ta’lim va madaniyat sohalarida muhim dasturlar amalga oshirilmoqda.
Shuningdek, suhbatda sanoat kooperasiyasi, axborot texnologiyalari, transport va logistika, farmasevtika va turizm sohalarida loyihalarni yanada ilgari surishga alohida e’tibor qaratilgan.
Turli darajalardagi faol muloqotlarni va “yo‘l xaritasi” asosida birgalikdagi ishlarni davom ettirishga kelishib olingan.
