Prezident Shavkat Mirziyoyev Rossiya delegatsiyasini qabul qildi
Uchrashuvda ikki mamlakat hamkorligini kengaytirish masalalari ko‘rib chiqilgan.
Bugun, 25-mart kuni O‘zbekiston Respublikasi Prezidenti Shavkat Mirziyoyev Toshkent xalqaro investitsiya forumida Rossiya delegatsiyasiga boshchilik qilayotgan Rossiya Federatsiyasi iqtisodiy rivojlanish vaziri Maksim Reshetnikovni qabul qildi. Bu haqda Prezident matbuot xizmati xabar berdi.
Ma’lum qilinishicha, Maksim Reshetnikov davlat rahbariga Rossiya Prezidenti Vladimir Putinning salomi va eng ezgu tilaklarini yetkazgan va Toshkent forumining muvaffaqiyatli natijalari bilan samimiy tabriklagan.
Uchrashuvda ko‘p qirrali O‘zbekiston–Rossiya hamkorligini kengaytirish bo‘yicha oliy darajada erishilgan kelishuvlarni amalga oshirish masalalari ko‘rib chiqilgan. Sanoat kooperatsiyasiga doir aniq loyihalarni ilgari surish va o‘zaro savdo ko‘rsatkichlarining ijobiy o‘sish sur’atlarini ta’minlashga alohida e’tibor qaratilgan.
Ta’kidlanishicha, o‘tgan yil yakuni bo‘yicha ikki tomonlama tovar ayirboshlash uchdan birga ortib, rekord daraja – 7,5 milliard dollarga yetgan. Joriy yilning birinchi oylarida savdo ko‘rsatkichlari 50 foizdan ziyodga oshgan. Bugungi kunda O‘zbekistonda 2 mingdan ortiq qo‘shma korxona muvaffaqiyatli faoliyat yuritmoqda, Rossiyadan iqtisodiyotimizga jalb qilingan investitsiyalar hajmi 10 milliard dollardan ziyodni tashkil etmoqda.
Shuningdek, uchrashuvda ikki mamlakat hukumatlari darajasida yaqindan hamkorlikni davom ettirish, shuningdek, O‘zbekiston va Rossiya o‘rtasidagi iqtisodiy hamkorlik bo‘yicha hukumatlararo komissiya salohiyatidan samarali foydalanish muhimligi ta’kidlangan.
