Men Madaniyat vazirligi ishini qoniqarsiz deb topaman – Baxtiyor Sayfullayev
Senat majlisida Ozodbek Nazarbekov boshchiligidagi vazirlik faoliyati keskin tanqid qilindi.
Joriy yilning 25-mart kuni Senatning Yoshlar, madaniyat va sport masalalari qo‘mitasi majlisi bo‘lib o‘tdi. Bu xaqda Senat axborot xizmati xabar qildi.
Ma’lum qilinishicha, majlisda madaniyat va san’at sohasining jamiyat hayotidagi o‘rni va ta’sirini yanada oshirish borasida olib borilgan ishlar yuzasidan O‘zbekiston Respublikasi madaniyat vazirining axboroti eshitilgan.
Muhokamalar jarayonida sohada amalga oshirilgan ishlar bilan birga ayrim kamchiliklar ham mavjudligi ta’kidlangan. Jumladan, vazirlik tizimida oliy ma’lumotli malakali kadrlar taqchilligi joylarda madaniyat sohasida davlat siyosatining samarali olib borilishiga, belgilangan vazifalar o‘z vaqtida va sifatli bajarilishiga salbiy ta’sir ko‘rsatmoqda.
Vazirlik tizimidagi 826 ta madaniyat markazining 436 tasida bino va inshootlar bilan bog‘liq muammolar borligi tufayli ular samarali faoliyat olib bormayapti.
Birgina Xorazm viloyatida 2019 – 2022 yillarda yangi quriladigan, rekonstruksiya qilinadigan, kapital ta’mirlanadigan va jihozlanadigan madaniyat markazlarining manzilli ro‘yxati doirasidagi 28,0 mlrd so‘mlik ishlar bajarilmagan.
Sobiq madaniyat vaziri, qo‘mita raisi Baxtiyor Sayfullayev madaniyat vazirligi tizimini tanqid qilgan: “Tizim bo‘lmagandan keyin natija ko‘rinmaydi. Ikki yildan beri kutamiz, yangi vazir, o‘ziga kelib olsin, o‘rgatmaylik dedik va nihoyat chegaraga yetib keldik”.
Senator Sayfullayev Madaniyat vazirligi tizimida oliy ma’lumotli kadrlar yetishmayotganini tanqid qilib, bilimsiz xodimlarni chetlashtirish taklifini bildirgan.
“Vazirni uyaltirayotgan, vazirning oyog‘idan tortayotgan, vazirlikni sharmanda qilayotgan mana shunaqa xodimlar”, — degan u.
E’tirozlarga javoban Nazarbekov ma’lum muddat vazirlik tizimidagi xodimlar maoshi keskin tushib ketgani ortidan xodimlarda ishchanlik qobiliyati pasayganini, ammo hozirda vaziyat ijobiy hal etilganini ma’lum qilgan.
“O‘sha paytlarda nafaqat talab qilsam, hatto, sal qovoq solib, qattiq gapirsam ham ketib qolayotgandi, xodimlar. O‘zi zo‘rg‘a yurishgandi”, — deydi vazir.
Uning aytishicha, hududlarda davlat-xususiy sherikchilik asosida madaniyat markazlari va istirohat bog‘lari tashkil etish, ularga tuman/shahar markazlaridan joy ajratish belgilangan. Ammo ishni amalga oshirishda to‘siqlar mavjud.
Qo‘mita raisi vazirlik Senat bilan bamaslahat ish olib bormaganini, mavjud muammolarni bartaraf etishda yordam so‘ramayotganini, berilayotgan imkoniyatlardan foydalanolmayotganini ta’kidlagan.
Yig‘ilish so‘nggida qo‘mita raisi tomonidan mutasaddilarga bir kun muddat ichida muammolar yechimiga qaratilgan takliflarni berish talabi qo‘yilgan.
“Hozir qat’iy qaror qabul qila olmayman. Men madaniyat vazirligi ishini qoniqarsiz deb topaman”, — deya yig‘ilishga yakun yasagan Sayfullayev.
