Zangiota tumani “zamhokimi” qidiruvga berildi
Unga nisbatan Jinoyat kodeksining 3 ta moddasi bilan ish ochilgan.
2022-yil 10-yanvargacha Zangiota hokimining qurilish bo‘yicha o‘rinbosari bo‘lib ishlagan shaxsga nisbatan Jinoyat kodeksining uchta moddasi bilan ayblov e’lon qilinib, sirtdan qamoqqa olish ehtiyot chorasi qo‘llangan va qidiruv e’lon qilingan.
Hozirda Zangiota tumani hokimligi mansabdor shaxslari va boshqalarga nisbatan qo‘zg‘atilgan jinoyat ishi yuzasidan tergov harakatlari olib borilmoqda.
Bosh prokurorning matbuot kotibi Hayot Shamsuddinov ma’lum qilishicha, jinoyat ishi doirasida Zangiota tumani hokimining sobiq o‘rinbosariga Jinoyat kodeksining 167-moddasi (o‘zlashtirish yoki rastrata yo‘li bilan talon-toroj qilish), 205-moddasi (hokimiyat yoki mansab vakolatini suiiste’mol qilish) va 209-moddasi (mansab soxtakorligi) bilan ayblov e’lon qilinib, sirtdan qamoqqa olish ehtiyot chorasi qo‘llanilgan hamda qidiruv e’lon qilingan.
Aniqlanishicha, jinoyat ishi tuman hokimining sanoatni rivojlantirish, kapital qurilish, kommunikasiya va kommunal xo‘jalik masalalari bo‘yicha sobiq o‘rinbosariga nisbatan qo‘zg‘atilgan. U 2022-yil 10-yanvardan o‘z arizasiga binoan lavozimidan ozod etilgan.
