DXX ta’lim sohasida 4 ta jinoyatni fosh qildi
Shuningdek, “Ayollar daftari”ga oid korrupsion holat ham aniqlangan.
O‘tkazilgan tezkor tadbirlar davomida bir qancha noqonuniy holatlar aniqlangan. Jumladan, Amudaryo tumani XTB va qurilish-ta’mirlash ishlari bilan shug‘ullanuvchi 2 nafar MCHJ mansabdor shaxslari o‘zaro til biriktirib, hududdagi maktablardan birining o‘quv binolarini ta’mirlash uchun ajratilgan jami 1 mlrd 235 mln so‘m pul mablag‘larining 177,6 mln so‘mini soxta ma’lumotlar orqali o‘zlashtirib olgani aniqlandi.
Amudaryodagi yana bir maktabda o‘qituvchi o‘zining hamkasbi ishonchiga kirib, tanishlari orqali uni malaka toifasi olish bo‘yicha attestasiyadan o‘tkazib berish evaziga 600 dollari olgan vaqtida ushlangan.
Shuningdek, Qashqadaryo viloyati Koson tumanidagi maktablardan birining direktori fuqaroni o‘qituvchi lavozimiga ishga qabul qilish evaziga 400 AQSH dollari olgan vaqtida qo‘lga olingan.
DXX va Bosh prokuratura huzuridagi Departament xodimlari tomonidan Toshkent shahrida o‘tkazilgan tezkor tadbirda esa 22 yoshli shaxs 2 nafar fuqaroni poytaxtdagi nodavlat oliy ta’lim muassasalaridan biriga o‘qishga kiritib qo‘yish evaziga 24 mln so‘m olgan vaqtida ushlangan.
Sirdaryo viloyati Guliston shahrida muqaddam firibgarlik bilan sudlangan shaxs fuqaroni hokimiyat idoralarida ishlovchi tanishlari orqali “Ayollar daftari” ro‘yxatiga kiritib, yangi qurilayotgan ko‘p qavatli uylardan 3 xonali xonadon sotib olishi uchun subsidiya olishida yordam berish evaziga 400 AQSH dollari olgan vaqtida qo‘lga tushgan.
Hozirda barcha holatlar yuzasidan Jinoyat Kodeksining tegishli moddalari bilan jinoyat ishlari qo‘zg‘atilib, tergov harakatlari olib borilmoqda.
