DXX soxta pul ishlab chiqaruvchilarni qo‘lga oldi
Ular 300 mln so‘mdan ortiq qalbaki banknotni muomalaga chiqarib yuborgan.
DXX va huquqni muhofaza qiluvchi organlar tomonidan o‘tkazilgan tezkor tadbirlarda qalbaki pul tayyorlab, uni muomalaga chiqarish bilan shug‘ullangan jinoiy guruh aniqlandi.
Jumladan, Chirchiq shahrida yashovchi fuqaro Buxoro shahriga borib, 10 mln 100 ming so‘m miqdoridagi qalbaki milliy valyutani 600 AQSH dollariga sotayotgan vaqtida ushlangan.
Shundan so‘ng uning jinoiy sherigi, Guliston shahrida istiqomat qiluvchi fuqaro 600 AQSH dollarini qabul qilib olgan vaqtida ushlangan. Uning yashash manzilida 2 mln 150 ming so‘m miqdorida qalbaki banknotlar borligi aniqlanib, prosessual tartibda rasmiylashtirib olingan.
Surishtiruv harakatlari davomida qalbaki pullar aslida Andijon shahrida tayyorlanishi ma’lum bo‘lgan.
Dastlab Andijon shahrida yashovchi shaxs o‘zining “Damas” rusumli avtomashinasida 3 mln 200 ming so‘m miqdoridagi 64 dona 50 ming so‘mlik qalbaki banknotlarni olib ketayotgan vaqtida qo‘lga tushgan.
So‘ngra mazkur qalbaki pullarni tayyorlovchi fuqaroning uyidan pul tayyorlashda kerak bo‘ladigan buyumlar hamda 14 mln 550 ming so‘m miqdoridagi qalbaki pullar ashyoviy dalil sifatida olingan.
Ta’kidlashicha, jinoiy guruh umumiy miqdorda 300 mln so‘mdan ortiq qalbaki pullarni tayyorlab, Andijon, Namangan va Farg‘ona viloyatlari hamda Toshkent shahrida muomalaga kiritishga ulgurgan.
Hozirda mazkur shaxslarga nisbatan Jinoyat Kodeksining 176-moddasi bilan jinoyat ishi qo‘zg‘atilib, tergov harakatlari olib borilmoqda.
