AQSH rasmiylari Hindistonni tanqid qildi
Bu Nyu-Delining Rossiya qurollarini sotib olishi bilan bog‘liq.
AQSH Hindistonning asta-sekin rus harbiy texnikasidan voz kechishini istayapti. Bu haqda Pentagon rahbari Lloyd Ostin maʼlum qildi.
“Hindiston bilan ishlashni davom ettiryapmiz. Biz Rossiya harbiy texnikasiga investitsiya kiritish ularning manfaatlariga javob bermasligini tushuntirishni istaymiz”, – degan u AQSH kongressining vakillar palatasidagi chiqishida.
Ostinning bu bayonoti kongressmen Jo Uilsonning Hindistonni tanqid qilganiga javoban berilgan.
“Вizning Hindiston kabi qimmatli ittifoqchimiz, dunyoning eng katta demokratiyasi Kreml bilan yaqinlashishga qaror qilgani, uning AQSH yoki ittifoqchilari harbiy tizimlaridan ko‘ra rus tizimlarini tanlagani dahshatli”, – degan Uilson.
Hindiston Moskva qurol eksportining yirik bozori hisoblanadi. Xususan, Dehli Rossiya tanklari, artilleriyasi, raketa tizimlarining faol xaridori.
Avvalroq dunyo qurol bozori to‘g‘risida hisobot eʼlon qilingandi.
